Россиядин Федерациядин Советдин Председатель Валентина Матвиенко 11-12-июлдиз Дагъустанда мугьманвиле хьа­на. Аэропортуна ам Дагъустан Республикадин Кьил Сергей Меликова, сенатор Ильяс Умаханова ва гьакI маса ксари къаршиламишна. Идан гьакъиндай “Лезги газетдиз” РД-дин Кьилин Администрациядин пресс-къуллугъди хабар гана. 

Россиядин парламентдин вини палатадин делегациядик гьакI Федерациядин Советдин Председателдин Сад лагьай заместитель Андрей Яцкин, ФС-дин илимдин, образованидин ва культурадин рекьяй Комитетдин Председателдин Сад ла­гьай заместитель, Дагъустан Республикадин государстводин гьукумдин исполнительный органдин векил Ильяс Умаханов ва масабур квай.

Сифте Валентина Матвиенко “Уйташ” аэропортунин международный терминал цIийикIа туькIуьр хъийизвай гьалдихъ галаз таниш хьана. Ахпа ФС-дин Кьил­ Кас­пийск шегьерда ишлемишиз вахканвай, 250 аял гьакьдай бахчадиз ва 500 аял­ди кIел­дай школадин дараматдиз, гьакI милли “Образование” проектдин сер­г­ьятра аваз эцигзавай аялрин идарайриз ки­лигна.

ФС-дин Председателди Дагъустан Республикада аялар хуниз талукь гьалдиз хъсан къимет гана. Ада къейдна хьи, яшайишдин кIвалерихъ галаз сад хьиз  школаяр ва аялрин бахчаярни эцигун йикъан истемишун я. Гьа са вахтунда ада  аялрин бахчайра, образованидин умуми идарайра аялар  хуьрекралди таъминарзавай гьалдизни фикир гана.

В.Матвиенкодин гафаралди, аялрин идараяр продуктралди таъминаруниз талукь конкурсар тухудайла, региондин фермерар ва суьрсет гьасилзавай ксарни желб авун лазим я.

Махачкъала шегьерда Валентина Матвиенкоди “Лезгинка” ансамблдин коллектив патал эцигнавай “Кьуьлерин кIвал” дараматдиз ва армияда къуллугъзавайбуруз, абурун хизанриз эцигнавай кIва­лериз килигна.

Идалай гуьгъуьниз Дагъустандин халкьдин шаир Фазу Алиевадин 90 йисан юбилейдихъ галаз алакъалу яз ам яшамиш хьайи кIвалерин цлал мемориалдин кьул ачухна. В.Матвиенкоди Да-гъус­танда Фазу Алиевадин экуь къамат эбеди яз рикIера хуьзвайди къейдна.

“Вад йис идалай вилик Махачкъалада халкьдин шаирдиз памятник хкажнай. Къе ам яшамиш хьайи кIвалел мемориалдин кьул эцигуни дагъустанвийриз чIехи шаир кIанивилин, адаз еке гьуьрмет авунин гьалар къалурзава, — лагьана В.Матвиенкоди.

Валентина Матвиенко Махачкъа­ладин 42-нумрадин юкьван школадиз фена ва ина ада Россиядин Игит Нурмегьамед Гьажимегьамедоваз ачухнавай мемориалдин кьулунин патав цуьквер эцигна.

Гьа и юкъуз ФС-дин Председателди “Дагъустан Республика яшайишдинни экономикадин рекьяй вилик тухунин сифтегьан везифайрин гьакъиндай” месэла веревирдзавай совещание кьиле тухвана. Ада къейдна хьи, Федерациядин Советди Дагъустан яшайишдинни экономикадин рекьяй вилик тухуниз еке фикир гузва. Адан кар алай хилер алатай йисуз парламентдин вини палатада республикадин Йикъар кьиле тухудайла веревирд­най. Анал фикирдиз къачур хейлин крарин са пай уьмуьрдиз куьчуьрмишнава.

ФС-дин Спикерди проектдинни сметадин документар туькIуьрунин, пудратдин карханайрин кIвалахдиз талукь  месэлайрални фикир желбна. Адан гафаралди, республикада арадал къвезвай месэлаяр гьялдай вири къуватар ва мумкинвилер ава. Дагъустанда эцигунрин еришар хейлин хкажда. Идахъ галаз ала­къалу яз, виликдай гъиле кьуна, акъвазарнавай эцигунрални чан хкида.

Валентина Матвиенкоди гьисабзавайвал, яшайишдин кIвалер эцигунихъ галаз герек инфраструктурани къайдадиз гъун лазим я. ФС-дин Кьили хабар гайивал, регионриз фидалди вилик ада социаль­ный сетрай  агьалийрин истемишунар, ар­заяр, абуру чпин яшайишдикай вуч кхьиз­ватIа чирзава. ИкI, Федерациядин Советдин Спикерди республикада аялрин бахчаяр, школаяр, больницаяр эцигуникай ихтилат кудна. “Яшайишдин дараматар эцигунин еришар артухарна кIанда, инвестицияр патални кутугай гьалар арадал гъун лазим я”, — лагьана В.Матвиенкоди. Адан гафаралди, виридаз  сад хьтин ихтиярар, мумкинвилер  тешкилун герек я. Гьа са вахтунда коррупциядин вилик падни кьуна кIанда.

Туризмдиз талукь яз В.Матвиенкоди лагьана: “Туризм вилик тухун патал региондин программа герек я. План авачиз са затIни арадал къведач”.

Ада хиве кьуна хьи, Федерациядин Советди инлай кьулухъни республикадиз вилик акъвазнавай месэлаяр гьялиз куьмек гуда.

В.Матвиенко Дербент шегьердизни мугьман хьана. Ам “Нарын-Къеледа” тешкилнавай халкьдинни художественный сеняткарри гьазурнавай шейэриз ки­лигна.

В.Матвиенко Дагъустандиз мугьман хьуникай РД-дин Кьилин официальный сайтдай гегьеншдиз кIелиз жеда.

Чи мухбир