Алатай гьафтедин эхирра «Лезги газетдин» кьилин редактор Мегьамед Ибрагьимова милли журналистикадин хиле къалурнавай лайихлувилерай ва хайи йикъахъ галаз алакъалу яз Алаудин Халидович Гьамидоваз «Лезги газетдин» — 100 йис» медаль гана.
А.Гьамидова 50 йисалай гзаф девирда «Лезги газетдин» редакцияда кIвалахна. Жуьреба-жуьре къуллугърал вичел ихтибар авур везифаяр намуслувилелди кьилиз акъудай пешекар журналистди эхиримжи йисара редакцияда яшайишдин месэлайрин ва чарарин отделдиз регьбервал гузвай.
РФ-дин ва РД-дин культурадин лайихлу къуллугъчи, СССР-дин журналистрин Союздин член тир А.Гьамидован къелемдикай жуьреба-жуьре темайрай кхьенвай вишералди макъалаяр, очеркар, зарисовкаяр, къейдер хкатна. Алатай йисуз Махачкъалада адан публицистикадин эсеррикай ибарат кьилдин ктабни чапдай акъатна.
Са шумуд йис идалай вилик пенсиядиз экъечIнавай журналистди хайи редакциядихъ галаз алакъаяр атIузвач, мукьвал-мукьвал коллективдал кьил чIугвазва. МасакIа хьунни мумкин туш, ина кIвалахай йисара “Лезги газетдин” редакция А.Гьамидов патал хайи кьвед лагьай кIвализ элкъвена.
Чна Алаудин Халидовичаз хайи югъ рикIин сидкьидай мубаракзава, адахъ чандин сагъвал, яргъи уьмуьр хьун алхишзава.
Агьмед Магьмудов
