РД-дин здравоохраненидин министерстводин пресс-къуллугъди хабар гайивал, Дербентдин центральный больницада алай аямдин ангиографиядин комплекс эцигнава. И муракаб техника РФ-дин Гьукуматдин резервдин фондунин гьисабдай ахъайнавай такьатрихъ РД-дин здравоохраненидин министерстводи къачуна.
“ЦIийи тадаракди духтурриз рикIин дамаррин, кьилин мефтIедин, гъилерин, кIвачерин, хуквадин дамаррин ва маса органрин диагностика вини дережада кьиле тухудай ва чукIулдин куьмек галачиз дамарар сагъардай мумкинвал гуда. Сифте нубатда инсанриз миокарддин инфаркт тахьун патал рикIин дамарар сагъарда. Ида республикадин кьиблепатан районрин агьалияр садлагьана кьиникьикай (дамарра ва мефтIеда тромб арадал атана) къутармишда ва инсанар хуьда”, — къейдна министр Татьяна Беляевади.
Алай аямдин тадаракдал кIвалахдай пешекарри Москвадин ва Краснодардин клиникайра чирвилер ва тежриба къачунва.
«Лезги газет»
