И йикъара СтIал Сулейманан районда алай йисан 23-мартдиз башламишай ва пуд вацран вахтунда давам хьайи чIехибурун командайрин арада мини-футболдай тухвай муниципалитетдин чемпионатдин нетижаяр кьуна.
Райондин спортдин, туризмдин ва жегьилрин крарин рекьяй комитетди тухвай чемпионатда 10 командади иштиракна. Абурун арада къугъунар — гьар са тур — кьилдин хуьрерин мини-футболдин майданрал кьиле фена.
Командайри санлай къазанмишай очкойрин кьадар гьисаба кьурла, “Агъа-СтIал” — 1, “ЦIийи поселок” — 2 ва “Агъа-СтIалрин Къазмаяр” командаяр 3 — чкайриз лайихлу хьана.
Гъалибчи ва приздин чкаяр кьур командадив, тафаватлу хьайи футболистрив кубокар, дипломар, медалар ва пулдин премияр вахкунин мярекатда (ам ЦIийи поселокдин мини-футболдин майдандал кьиле фена) райондин кьил Саид Темирханова, райадминистрациядин кьилин 1-заместитель Лацис Оружева, Россиядин футболдин союздин инспектор Феликс Шекерханова, Аргентинадай тир футболдай пешекар — тренер Хуан Альберто Вильянуэнва Пласенсияди, райондин спорткомитетдин кьил Чингиз Абдулмежидова иштиракна, абур анал тебрикдин келимаяр рахана.
Гъалибчи командадив чемпионвилин кубок вахкуналди, Саид Темирханова районда футбол вилик физвайди къейдна.
— Республикада футбол вилик тухуниз региондин Кьил Сергей Алимович Меликова екез фикир гузва, — къейдна Саид Темирханова. — И къайгъударвилиз жаваб яз, чи райондани футбол виниз тир дережадиз акъатдайдахъ зун кIевелай инанмиш я. Сифте агалкьунарни чахъ ава: мукьвара райондин “Кюре” командади Дагъустандин милли футболдин лигадин кубок къачуна. Райондин саки вири хуьрера мини-футболдин майданар туькIуьрнава, и кIвалах давамарзава. Идани, са рахунни алачиз, районда футбол вилик тухуниз куьмекда.
Райондин чемпионатдин нетижайрай тафаватлу хьайи кьилдин спортсменризни махсус пишкешар ва пулдин премияр гана.
Саид Темирханова райондиз атунай, тренеррихъ ва футболистрихъ галаз бегьерлу кIвалах тухунай Аргентинадай тир пешекар — тренер Хуан Альберто Вильянуэнва Пласенсиядив чухсагъулдин чарни вахкана.
Хазран Кьасумов
