3-июлдиз Италиядин меркез Римда азаддаказ кьуршахар кьунай 21 йисал къведалди яшара авай жегьилрин арада Европадин кIвенкIвечивал патал кьиле фейи акъажунра (ана дуьньядин 11 уьлкведин хкянавай командайри иштиракна) Азербайжан республикадин патай экъечIзавай чи кьегьал Жабраил Гьажиева (74 кг-дал къведалди заланвал авайбурун арада) инанмишвилелди (ада 5 бягьс кьиле тухвана) къизилдин медаль къазанмишна. Аферин!
РикIел хкин: вичин ери-бине Ахцегьай тир Ж.Гьажиева алатай йисуз Болгариядин Пловдив шегьерда азаддаказ кьуршахар кьунай 23 йисал къведалди яшара авай жегьилрин арада кьиле фейи акъажунрани Европадин кIвенкIвечивилин тIвар къазанмишнай. А чIавуз финалдин акъажунра Жабраилаз Румыниядай тир Кристиан Биро 8:1 гьисабдалди кумукьнай.
И сеферда финалдин акъажунра Жабраилахъ галаз бягьсиниз Молдовадай тир Георги Кара экъечIнавай. Чи ватанэгьлиди адазни гъалибвал къазанмишдай гьич са кIусни мумкинвал ганач — бягьс 11:1 гьисабдалди акьалтIна. Адалай вилик кьиле тухвай бягьсерани Ж.Гьажиеваз Георгис Терзидис (Греция) — 10:0, Луки Финицио (Италия) -11:0, Кристиан Биро (Румыния) — 6:2 ва Мугьаммед Озмус (Туьркия) 7:0 гьисабралди кумукьуналди, чи ватанэгьлиди инанмишвилелди гъалибвал къазанмишна.
Рагнеда Рамалданова
