Дуьшуьшдик акатай туристар Ахцегь, Докъузпара районрин, Дербент шегьердин духтурханайриз агакьарна
Алатай гьафтедин эхирра Докъузпара райондин Къурушрин хуьруьн мулкара туристар авай машин кьвалалай кIамуз аватна. “Лезги газетдиз” муниципалитетдин администрациядин пресс-къуллугъди хабар гайивал, и дуьшуьшдин нетижада машиндин къеневай 6 касдални жуьреба-жуьре хирер-кьацIар хьана.
Хабар агакьнамазди, Докъузпара райондин ЦБ-дин кьилин духтурдин заместитель Рустам Рамазанов, Къурушрин, Миграгърин хуьрерин ФАП-рин заведующияр Кьасум Алимовни Амур Исмаилов, тади куьмекдин къуллугъдин духтурар тир Эльфира Садировани Далгат Бухсаев чкадал фена. Дуьшуьшдик акатнавайбурукай сад акьалтIай пис гьалда авай: духтуррин пешекарвал ва абуру энгел тавуна кьабулай серенжемар себеб яз, ам къутармишиз хьана. Сифте куьмек гайидалай кьулухъ ам Ахцегь райондин кьилин духтурханадиз рекье туна. Амайбуруз медицинадин рекьяй герек тир куьмек Докъузпара райондин ва Дербент шегьердин духтурханайра гана.
Дуьшуьшдик акатайбуруз сифте куьмек гунин карда Къурушрин хуьруьн агьалийрини МЧС-дин дестеди иштиракна. Докъузпара райондин кьил М.Шамилова туристриз куьмек гунин кардик пай кутур духтурриз, МЧС-дин къуллугъчийриз, къурушвийриз сагърай лагьана.
Къейд ийин хьи, Дагъустандиз мугьман жезвай туристрин кьилел идалай виликни дуьшуьшар атана. Мисал яз, алай йисан июндин эвел кьилера Шамил райондани машин кьвалалай аватна. Адан къене 41 йис хьанвай дишегьлини 11 йис хьанвай гада авай. Нетижада Нижний Новгороддай Дагъларин уьлкведин надир чкайриз килигиз атай дишегьли хасаратвилерик телеф, гададал лагьайтIа, хирер кьацIар хьана.
Июндин вацра Авар Къойсу вацIал луьткведа аваз сирнавзавай туристрикай сад вацIуз аватна. Гена къерехдал ял язавай чкадин агьалийрикай садаз и кар акуна, тадиз куьмек гуз фена. Ада вахтунда кьабулай серенжемар себеб яз, турист къутармишиз алакьна.
Гьайиф хьи, Дагъустанда Каспий гьуьлени гьар йисуз цIудралди инсанар батмиш жезва. РД-дин МЧС-дин делилралди, цIи республикадин пляжрал 7 кас батмиш хьана. 28-июндиз Махачкъалада “Березка” пляждин мулкарал 14 ва 15 йисар хьанвай рушни гада гьуьле батмиш хьана. Гададин мейит гилани жагъанвач.
Гьина аваз хьайитIани, сифте нубатда мукъаят хьана кIанда. Жув-жуван къуватрихъ агъана, хаталу гьерекатрик кьил кутун эсиллагь виже къведач.
Чи мухбир
