Алай вахт алафар гьазуруниз кутугай азгарди я. И кар чиз, райондин регьберрин ва УСХ-дин пешекаррин гуьзчивилик кваз кIвалахдив тешкиллувилелди эгечIнава. Районда 8220 кьил къарамаларини 14 агъзурдалай виниз куьлуь карч алай гьайванри къулай ва таъмин кьуьд акъудун патал общественный ва хсуси майишатрин вилик цIи санлай 26 агъзур тонн векъи алафар (векьерни самар) кIватIунин жавабдар везифа акъвазнава. Райондин УСХ-дин пешекаррин гафарай, гьелелиг 5 агъзур тонндилай артух алафар кIватIнава. Иллаки хъсан нетижаяр ЛПХ-рин маргъухъанри къалурзава.
— Четинвилер бес кьадарда пресс-подборщикар тахьунихъ галаз алакъалу я. Гьеле хабар гайивал, алай вахтунда хсуси майишатриз, кьезил шартIаралди хуьруьн майишатдин гъвечIи техника маса къачуна, ишлемишдай хъсан мумкинвал ава. Ида лежберрин зегьмет кьезиларунихъ галаз санал гьакI вахтни, пулни кьенятзава. Маса къачузвай техникадин 50 % пул гьукуматди гузва. Гьелелиг и хъсан мумкинвиликай районда вучиз ятIани анжах 25 касди менфят къачунва, — лугьузва райондин УСХ-дин начальникдин заместитель Адилхан Агьмедова.
Дашдемир Шерифалиев
