И йикъара лезгийрин машгьур шаир, таржумачи Зульфикъар Шихнесирович Къафланован 65 йис тамам жезва. Лезги шииратдиз 80-90-йисара атай авторди чи милли эдебият вилик тухуник лайихлу пай кутунва: адан къелемдикай хкатнавай ктабри лезги шииратдин жебеханада кьетIен чка кьунва.
З.Къафланован шииратдин алем жуьреба-жуьре образралди, цIийи, хци фикирралди, ажайиб рангаралди, кIалубралди, гьиссералди девлетлу я. Алимар тир Гьажи Гашарован, Сейфедин Бедирханован, Халидин Эльдарован ва масабурун илимрин кIвалахра абурукай гегьеншдиз раханва, кутугай къиметни ганва.
“Лезги газетдин” редакциядин коллективди Зульфикъар Къафлановаз уьмуьрдин 65 лагьай гад рикIин сидкьидай мубаракзава. Къуй инлай кьулухъни куь уьмуьрдиз мугьман хъжедай гатар бегьерлубур, шад легьзейрив ацIайбур, агалкьунар галайбур хьурай. Тебрикрихъ галаз санал чна газет кIелзавайбуруз юбилярдин цIийи шиирарни теклифзава.
Зульфикъар Къафланован цIийи шиирар «Лезги газетдин» сайтдайни кIелиз жеда.
«Лезги газет»
