Йисан вахтарикай гад гьар са касдиз виридалайни хъсандиз кьиле тухуз кIанзавай бере я. Гзафбуру отпускни гьа и вахтунда къачуда. Чи республикада ял ягъун патал  виридалайни хъсанбур гьи чкаяр я? И кар за са шумуд касдивай чирна…

Зуьгьре: “Гьелбетда, Каспий гьуьл. Мумкин я, Махачкъалада гьуьлуьн кьерер са акьван та­рифдайбур туш, амма чими ядни ава, рагъ гудай хъсан мумкинвални. Лугьун хьи, пляждал маса гузвай гьажибугъдадин таза кIашар, винелай са тIимил кьелни кIвахна, тIуьн квяй я!

Сирнав ийиз хуш тушир ксари­вай аттракционрин паркуна ял ягъиз­ ва электросамокатрал алаз фи­налди чеб машгъулариз жеда. Махачкъалада эхиримжи йисара ко­фейнияр гзаф хьанва. Анра гьам­ къайи ятар, гьамни мороженияр, гьамни кофе ва чай хъваз же­да. Нин рикIиз вуч хуш ятIа, — гьам”.

Карина: “Гад шегьердивай къерехда, гьуьлуьн кьерера эцигнавай гъвечIи кIвалера, гьич са къайгъуни авачиз, акъудиз жеда. Ресторанрин иесийри квез, шашлыкдин вири жуьреяр хьиз, яр-емишрикай гьазурнавай витаминрин курс, са гафуналди, неинки Кеферпатан Кавказдин, гьакIни Закавказьедин вири тIуьнар теклифда. Идахъ галаз сад хьиз, квев ра­къи­нин нурарни булдаказ  агакьда”.­

Али:  “Кьасумхуьр ял ягъун патал лап вижевай чка я. Михьи гьава, гьар жуьредин яр-емиш, экологиядин жигьетдай михьи продуктар кIамай кьван ава”.

Мадина: “Махачкъалада ял ядай гзаф чкаяр ава. Абурукай садни мукьвара зун фейи ботаникадин багъ я. Секин ва гзаф рикIи чIугва­дай чка тир ина жуьреба-жуьре набататар, къацу чIур хьиз, чан алай затIарни ава: хазарилай эгечIна, балкIанрал къведалди. ЧIехи и багъда квез вахт гьикI акъатнатIани чир жедач.

ГьакI дагъдиз хкаж хьайитIани жеда. Анай шегьер лап гуьрчегдиз аквада, иллаки йифиз, эквер куь­кIуьрай береда!”

Патимат: “За шегьердин пляж виридалайни хъсандиз ял ягъиз жедай чка яз гьисабзава. Инаг неинки гьуьлуьн кьер, гьакIни са жерге ресторанар, аттракционар авай къулай чкани я. Ана югъ гьикI акъат­натIани чир жедач.  Ял ядай чкаяр чи республикада кIамай кьван ава. КIанзавайди мумкинвал, такьа­тар, ашкъи-гьевес я”.

Камилла Мегьтиханова,

ДГУ-дин филфакдин

журналис­тикадин отделенидин студентка