Докъузпара райондин Усугъчай хуьре Ватандин ЧIехи дяведин иштиракчи, дивизиядин командир хьайи полковник Хайирбег Демирбегович Заманован экуь къаматдиз бахшнавай мемориалдин кьул ачухуниз талукьарнавай мярекат кьиле фена.
“Лезги газетдиз” муниципалитетдин администрациядин пресс-къуллугъди хабар гайивал, мярекатда райондин кьилин заместитель Салигь Гьажимурадова, Вирироссиядин ветеранрин тешкилатдин Дагъустанда авай отделенидин председатель Магьарам Алижанова, РФ-дин ва РД-дин хуьруьн майи-шатдин лайихлу къуллугъчи Сабир Наврузова ва масабуру иштиракна.
Мярекатдал рахайбуру Х.Заманован женгинин зурба лайихлувилер къейдна, Орел, Воронеж, Киев, Львов ва маса шегьерар азаддайла, ада къалурай кьегьалвилер рикIел хкана.
М.Алижанова вичин рахунра къейд авурвал, дяведин йисара Х.Заманов дагъустанвийрикай дивизиядиз регьбервал гайи тек сад я. “Женгера къалурай кьегьалвилерай чи баркаллу ватанэгьли Ленинан, Суворован III дережадин, Александр Невскийдин, Яру Пайдахдин, Ватандин дяведин I дережадин орденриз лайихлу хьана. Ам гьакIни Советрин Союздин Игитдин тIвар ва генералдин чин гунизни къалурнавай. Дирибаш хцин экуь къамат чи рикIера эбеди я”, — лагьана М.Алижанова.
Алай йисуз Х.Заманов дидедиз хьайидалай инихъ 115 йис тамам хьанва. Адан уьмуьрдин ва женгерин рекьерикай кхьенвай гегьенш макъала 2022-йисан 17-нумрада чапнава.
Чи мухбир
