И йикъара 85 йисан яшда аваз философиядин илимрин доктор, ДГУ-дин профессор Салигь Шабанович Муслимов рагьметдиз фена.

С.Ш.Муслимов 1937-йисан 13-октябрдиз Кьа­­сумхуьруьн райондин Ци­цIигъ­­­­рин хуьре ди­де­диз хьана. Агалкьунралди Дербентдин педколледж акьал­тIа­рай­да­лай кьулухъ ам ДГУ-дин тарихдинни филологиядин факультетдик экечIна. Гуьгъуьнлай кьуд йисуз мектебда муаллим яз кIва­лахна. 1965-йисалай С.Муслимов илимдин рекьел элячI­на, аспирантурадиз гьахьна. Ам жергедин муаллимвилелай республикадин кесерлу­ вуздин профессордин дережадал кьван виликди фена. 1970-йисуз — илимрин кандидатви­лин, 1989-йисуз докторвилин диссертацияр хвена.

С.Муслимова вичин вири уьмуьр илимдин рекьиз бахшна. Адан къелемдикай илимдин 200-далай гзаф макъалаяр, учебникар, пособияр, монографияр хкатна. Адан регьбервилин алакьунар себеб яз, Дагъустанда 2002-йисалай философиядин “Камалдин ван” журнал акъатзава.

Кафедрадин профессор яз, С.Муслимова илимдин са шумуд кандидат гьазурна. Жегьилрихъ галаз кIвалахун, абуруз илимдин сирер чирун алимдин рикI алай крарикай сад тир. Ада Дагъустанда философиядин илим дериндай ахтармишуниз кьетIен фикир гузвай, Урусатдин гуманиствилин жемиятдин Дагъустанда авай отделенидин председателдин везифаяр тамамарзавай.

Илимдин хиле агалкьунрай С.Муслимоваз 1998-йисуз — “РД-дин илимдин лайихлу деятель”, 2002-йисуз “РФ-дин кьилин пешекарвилин образованидин гьуьрметлу къуллугъчи” тIварар гана.

С.Муслимова лезги халкьдин уьмуьрда активнидаказ иштиракзавай. Ам Махачкъалада кьиле физвай лезгийрин саки гьар са мя­рекатда аквадай. Санал кIвалахай юлдашри, ярар-дустари, чирхчирри алим къени инсан, гъавурда авай пешекар, чIехи ватанперес хьиз рикIел хкизва. Ам чи рикIерани гьахьтинди яз амукьда.

“Лезги газетдин” редакциядин кол­лективди РД-дин милли сиясатдин ва динрин крарин рекьяй министр Энрик Селимович Муслимоваз, рагьметлудан хизанриз, вири мукьва-кьилийриз башсагълугъвал гузва.