“Шарвили” — 2022

25-июндиз СтIал Сулейманан районда лезги халкьдин къагьриманвилин “Шарвили” эпосдин сувариз талукьарнавай шадвилин мярекат кьиле фида. Идакай “Лезги газетдиз” муниципалитетдин администрациядин пресс-къуллугъди хабар гана.

Мярекатдин сергьятра аваз Кьасумхуьрел, медениятдин И.Тагьирован тIварунихъ галай маканда милли эдебиятдиз, сеняткарвилериз талукьарнавай выставкаяр, спортдин акъажунар, жуьреба-жуьре конкурсар кьиле тухуда. Гъалибчийриз савкьатар гуда. Суварихъ галаз алакъалу яз “Куьредин ярар” журналдин махсус нумра  акъуддайвал я.

Къейд ийин хьи, эпосдин сувариз талукь кьилин мярекатар икьван чIавалди Ахцегь районда тешкилзавай. 2019-йисуз ана эпосдин юбилейдин — 20-сувар — кьиле тухванай. 2020-йисуз, коронавирусдихъ галаз алакъалу яз, тешкиллувилин комитетди сувар тухун тийидай къарар кьабулнай. 2021-йисузни тIугъвалдин лепе яваш тахьуникди “Шарвили” эпосдин сувар жуьреба-жуьре районра гуьтIуь сергьятра къейднай.

«Лезги газет»