Дагъустанда Урусатдин югъ гурлудаказ къейдна
12-июндиз, уьлкведин жуьреба-жуьре регионра хьиз, Дагъустандани Урусатдин йикъаз талукьарнавай хейлин мярекатар кьиле фена. Республикадин меркезда хьайи шадвилерик, Махачкъаладин администрациядин делилралди, 25 агъзурдав агакьна инсанри иштиракна. Къизлярда и лишанлу вакъиадиз бахшнавай мярекатдин сергьятра аваз шегьердин кьил Александр Шувалова агьалийриз яшайишдин рекьяй къуллугъдай управленидин къуллугъчийрив гьуьрметдин грамотаяр вахкана. Къумторкъала районда лагьайтIа, и юкъуз хуьруьн майишатдин недай-хъвадай суьрсетдин мекера тешкилнавай.
Урусатдин югъ Кьиблепатан Дагъустандани гурлудаказ къейдна. Гьар са районда, шегьерда концертар, гуьруьшар, ватанпересвилин серенжемар кьиле тухвана.
ИкI, Дербент шегьерда сувариз талукьарнавай мярекатар са шумуд чкада тешкилнавай. 10-июндиз “Нарын-къала” стадиондал “Триколор страны родной” лишандик кваз уьлкведин пайдахдиз талукьарнавай, Вирироссиядин серенжемдиз бахшнавай мярекат кьиле фена. Ана волонтеррин тешкилатри, государстводин ва жемиятдин деятелри, футболдин “Дербент” клубдин коллективди, аялринни жаванрин спортдин школайрин тербиячийри иштиракна. Шад мярекат Россиядин Федерациядин гимн тамамарунилай гатIунна. Шегьердин кьилин заместитель Видади Зейналова шегьерэгьлийриз кьилин сувар мубаракна. Гуьгъуьнлай цавуз Россиядин Федерациядин 25 метр алай пайдах хкажна.
Гьа и юкъуз Урусатдин йикъан суварин сергьятра аваз Дербентдин кьил Рустамбек Пирмегьамедов шегьердин юнармейцийрихъ галаз гуьруьшмиш хьана. Ада ватанпересвилин мярекатра ва шегьердин юнармейцийрин гьерекатда активнидаказ иштиракунай жуьреба-жуьре мектебра кIелзавай ирид аялдив “Юнармейская доблесть III степени” медалар вахкана.
12-июндиз “Женгинин баркалладин” музейда “Россия зи дамах я” лишандик кваз Урусатдин йикъаз талукьарнавай кинолекторий кьиле тухвана. Мярекатдин сергьятра аваз музейдин заведующий А.Кьасумова, анин къуллугъчи Г. Мирзебалаевади, экскурсовод Н. Тагъиевади кIватI хьанвайбуруз Урусатдин тарихдин важиблувиликай, уьлкведин аслу туширвилин Декларация кьабулуникай суьгьбетар авуна ва чи баркаллу Ватандин тарихдикай гьазурнавай документальный кинолентериз килигна.
Къагьриман Ибрагьимов
