Урусатдин жуьреба-жуьре регионри Донецкдин ва Луганскдин халкьдин республикайра яшамиш жезвай агьалийриз гуманитарный куьмек гун давам жезва. И йикъара мергьяматлу серенжемдик Дагъустандини нубатдин сеферда вичин пай кутуна.
“Лезги газетдиз” республикадин Гьукуматдин пресс-къуллугъди хабар гайивал, Урусатдин югъ къейдзавай 12-июндиз Дагъларин уьлкведи ДНР-дизни ЛНР-диз нубатдин куьмек рекье туна. РД-дин Кьил Сергей Меликован теклифдалди Махачкъаладай — 6, Къизилюртдай 4 фурада аваз куьмекдихъ муьгьтеж агьалийрив 186 тонн недай-хъвадай суьрсет агакьарна.
Къейд ийин хьи, гуманитарный куьмекдик республикадин муниципалитетри, гьукумдин органри, жемиятдин векилри, меценатри, жергедин агьалийри чпин пай кутуна. Рекье тунвай затIарин арада гьар жуьредин суьрсетар, яд, дарманар, парталар, аялар патал метягьар ава.
Лагьана кIанда, ДНР-дизни ЛНР-диз идалай кьулухъни куьмек гун давам жеда.
«Лезги газет»
