14-июндиз РД-дин Кьилин ва Гьукуматдин Администрациядин кьил Алексей Гьасанован регьбервилик кваз Махачкъалада регион идара ийидай центради (Центр управления регионом — ЦУР) 11-майдилай 13-июндалди ахтармишнавай хци месэлайриз талукьарнавай совещание кьиле фена. Адан кIвалахда республикадин Гьукуматдин векилри, министерствойринни ведомствойрин, шегьерринни районрин кьилери иштиракна.
Мярекат гатIундайла, Алексей Гьасанова къейд авурвал, ЦУР кардик акатна са акьван гзаф вахт туштIани, и тешкилатди вичин менфятлувал тамамдиз къалурнава. Адан гафаралди, центради гьукумдин органринни жемиятдин арада алакъаяр ачухбур, ихтибар ийиз жедайбур хьунин жигьетдай чIехи кIвалах кьиле тухузва. Амма ЦУР-дин кьилин везифа агьалийрихъ авай дердияр, месэлаяр винел акъудун, ахтармишун ва абуруз талукь идарайри, энгел тавуна, фикир гун таъминарун яз амукьзава.
РД-дин Кьилин ва Гьукуматдин Администрациядин кьили республика туристар кьабулиз гьазур хьунин месэладиз кьетIен фикир гана. “Исятда гьам чкадин агьалийри, гьамни къецепатай къвезвай мугьманри ял ядай, сагъламвал мягькемардай къулай шартIар тешкилунихъ галаз алакъалу вири крар важиблу я. Абурун арада, мисал яз, пляжар авай гьал, цин объектрал, иллаки гьуьлел хатасузвал, ресторанрин, кафейрин кIвалах… ава”, — лагьана ада.
А.Гьасанова гьукумдин органрин векилри социальный сетра активнивал артухарунин игьтияж авайдини къейдна. Ихтилат официальный аккаунтар тешкилуникай, абур хъсан ери аваз кьиле тухуникай физва. Абурун куьмекдалди министерствойрин, ведомствойрин, муниципалитетрин кьилери чеб инсанрихъ галаз диалог тухуз гьазур тирди къалурун герек я.
Гуьгъуьнлай ЦУР-дин регьбер Мегьамедсултан Абдуралимова центради эхиримжи вацра кьиле тухванвай кIвалахдикай ихтилатна ва нетижаяр кьуна.
Адан гафарай якъин хьайивал, алай вахтунда Дербент районда Давыдовадин тIварунихъ галай аварийный гьалда авай мектебдиз талукь месэла гьялзава. Кьилди къачуртIа, 300-350 кIелдай чка авай мектебдин цIийи дарамат эцигун патал герек къвезвай чилин мулк гьазурунин къайгъуйрик ква. Гуьмбет райондин ЦIийи Аргвани хуьре школа-интернат эцигна акьалтIарун патал Дагъустандин гьукуматдин резервдин фондунай 5 миллион манат пул чара авун фикирдиз къачунва. Алай йисан августдин вацра республикадин инвестицийрин объект ишлемишиз вахкуда ва 1-сентябрдилай аялри цIийи мектебда чирвилер къачуда.
Избербаш шегьер целди таъминарунин месэла гьялунни давам жезва. Аэропорт авай мулкара и шегьердив яд агакьарзавай цин турбадин аварийный гьалда авай участокдал цIийикIа туькIуьр хъувунин кIвалахар акьалтIарнава. Совещанидал къейд авурвал, и турбадик агьалийри къанунсуздаказ чпин кIвалериз яд тухудай турбаяр кутуникди шегьердив бес-кьадар яд агакьзавач. Талукь идарайри и кардин вилик пад кьунин жигьетдай серенжемар кьабулзава. Избербаш шегьердин къенепатани 68 километрдин мензилда авай цин турбаяр цIийибуралди эвез авун патал алай вахтунда проектдинни сметадин документация гьазурзава.
11-майдилай 13-июндал кьван кьиле тухванвай кIвалахдикай рахадайла, М.Абдуралимова хабар гайивал, и вахтунда центради 2460 агьалидилай атанвай арзаяр кьабулна. Асул гьисабдай дагъустанвийрик къайи яд, экв тахьуни, къайдадикай хкатнавай рекьери къалабулух кутазва. Чпин арзайра абуру гьакIни образованидин, экологиядин, экономикадин, яшайишдин хилериз талукь месэлаярни къарагъарнава.
Арзаяр ахтармишайдалай кьулухъ якъин жезвайвал, иллаки дагълух районра мукьвал-мукьвал эквер хкатзава. Бязи муниципалитетрин ясли-бахчайрани мектебра медицинадин къуллугъчи кьабулун патал герекзавай штатдин уьлчме авач. Эхиримжиди гьялдай рекьерикай рахадайла, ЦУР-дин кьили къейд авурвал, и месэла РФ-дин финансрин министерстводи чара ийизвай бюджетдин такьатрихъ галаз алакъалу я. Гьавиляй РД-дин образованидин ва илимдин министерстводал республикадин здравоохраненидин министерстводихъ галаз санал, федеральный ведомствони желб авуна, месэла гьялун тапшурмишнава.
Совещанидал яшайишдин хилез талукь яз атанвай арзаярни веревирдна. М.Абдуралимован гафаралди, Махачкъала шегьердин Гьамидован тIварунихъ галай куьчеда авай 9 “Б” нумрадин гзаф мертебайрикай ибарат кIвалера лифт авач. Ашкара хьайивал, и кардикай сифте яз Паралимпийский къугъунрин чемпионка Сакинат Мегьамедовади хабар гана. Спортсменка вич и кIвалин 11-мертебада яшамиш жезва. Ина гьакIни гзаф кьадар пенсионерар, инвалидар ава. Лифт авачирвиляй абурувай, кIан хьайила, куьчедизни экъечIиз жезвач.
И месэладин гьакъиндай баянар РД-дин яшайишдин инспекциядин регьбер Сергей Касьянова гана. Якъин хьайивал, инспекциядин къуллугъчияр арза кхьей Сакинат Мегьамедовадихъ галаз гуьруьшмиш хьана. “Шегьердин администрациядихъ галаз чна и месэла гьялдай рехъ тайинарнава: кIвал ремонт авунин жигьетдай кардик квай махсус программадик кутунва ва алай йисуз ана цIийи лифт эцигда”, — хиве кьуна С.Касьянова.
Агьмед Магьмудов
