Америкадин философ Ральф Эмерсонахъ ихьтин са келима ава: “Муаллим четин затIар регьятариз алакьзавай кас я”. ИкI, четин затIар регьятариз кIвалахзавайбурукай сад Къалажухрин юкьван умуми образованидин мектебда алай вахтунда 2-классдин аялриз тарсар гузвай Саният Абдулазизовна Гуьлнезерова я.
Саният Гуьлнезерова 1970-йисуз Мегьарамдхуьруьн райондин Хуьрелрин хуьре дидедиз хьана. Мектеб куьтягьайдалай кьулухъ 1987-1990-йисара Липецкий областдин Усманский райондин педколледжда кIелна. Муаллимвилин пеше къачур ада кьве йисуз анин Чаплыгинский райондин Зенкино хуьруьн мектебда 1-2-классриз тарсар гана.
1992-йисуз кьисметди ам Докъузпара райондин Къалажухрин хуьруьз акъудна ва гъвечIи классриз тарсар гуз башламишна.
Аялриз чирвилерни тербия гунин кардиз 27 йис бахшнавай кьилин категориядин муаллимди вичин зегьметда бегьерлувални гьакъисагъвал фадлай субутнава. 2012-йисуз адаз “РД-дин образованидин отличник” тIварцIин шагьадатнама ва махсус лишан гана. 2015-йисуз адан гьакъисагъ зегьмет РФ-дин образованидинни илимдин министерстводи гьуьрметдин грамотадалди, аялар олимпиадайриз гьазурунай ва абур кьиле тухунай “Бажарагълу жегьилриз куьмек гунин центради” дипломдалди къейдна. Адахъ хейлин маса грамотаяр, чухсагъулдин чарарни ава.
Зи фикирдалди, С.Гуьлнезеровадин зегьмет гьуьрметдин маса тIвараралдини къейд авуниз кутугнава. Дамах гвачир кас яз, вич ихьтин тIварар къачунихъ къекъвезвач. Кьилинди ада вичи тарсар гайи ученикрихъ жезвай агалкьунар яз гьисабзава. Ада тарсар гайи са жерге аялрикай къе жавабдар къуллугъчияр, хъсандиз кIелзавай студентар хьанва. С.Гуьлнезеровади са бязибурун тIварар кьазва: Серпухов шегьерда военный академия куьтягьай, алай вахтунда Къазахстанда къуллугъзавай А.Эмиралиев, гьа шегьерда военный рекьяй кIелзавай А.Гуьлнезеров, Ленинградда гьа и рекьяй кIелзавай А.Гьабибов, Воронеждин военный академияда кIелзавай В.Гуьлнезеров, медучилищедин студент К.Жаватова ва мсб.
Зегьметдин ветеран С.Гуьлнезерова сифтегьан классрин методобъединенидин председателни я.
Мектебдин завуч А.Эвленова къейдзава: “Тежриба къачун патал мектебдиз къвезвай студентар чна Саният муаллимдин патав ракъурзава. Адан зегьметдин рехъ жегьил муаллимар патал чешне я…”
— Аямдин муаллим гьихьтинди хьун герек я? — хабар кьуна за С.Гуьлнезеровадивай.
— Вири рекьерай вилик фенвайди. Тежрибадилай, яшдилай аслу тушиз, алай аямдин муаллим девирдин истемишунрихъ галаз кам-камуна аваз фена кIанда. Муаллимдихъ тарсунин вахтунда компьютер, интернет, техникадин жуьреба-жуьре такьатар ишлемишдай алакьунар хьун герек я.
Дагълух чкайра авай вири школайрихъ ихьтин мумкинвилер авач. Гьавиляй гьамиша девирдин истемишунрални амал ийиз жезвач. Муаллимдин гъилик, гьич тахьайтIа, ноутбук хьун чарасуз я. Авайвал лагьайтIа, ФГОС чи шартIара са тIвар патал я, — гьайиф чIугуналди, наразивалзава муаллимди ва алава хъийизва: — Гьар гьикI ятIани, аялриз тамам чирвилер гун патал алахъна кIанда.
Квехъ мадни еке агалкьунар хьурай, гьуьрметлу Саният Абдулазизовна!
Куругъли Ферзалиев
