Вини СтIалдал, гьар йисуз адет хьанвайвал, “Илимдиз кам” лишандик кваз математикадай республикадин олимпиада кьиле фена.
Сифте жуван хайи хуьруьн мектебда кIелзавай аялар патал чирвилер ахтармишунин ихьтин серенжем тухуз эгечIайди ва къе республикадин дережада аваз ам тешкилзавайди техникадин илимрин доктор, профессор Абдул Баламирзоев я. Хсуси такьатрихъ сад лагьай олимпиада тешкилайла, школадин муаллимрин ва ученикрин ашкъи, гъалибчийрин ва тафаватлу хьайибурун гьевес акур Абдул Баламирзоеван руьгь мадни хкаж хьана. Йисалай-суз ада и мярекатдин дережа хкажзава, иштиракчийрин кьадар артухарзава. ИкI, олимпиада райондин, районрин уртах, Кьиблепатан Дагъустандин ва республикадин дережайриндаз элкъвена.
ЦIи олимпиадада республикадин гзаф районрай атанвай 5-11-классра кIелзавай 300 ученикди иштиракна. КIвалахар ахтармишзавай комиссиядик тежрибалу математикар Аскер Аскеров, Гьабибула Гьабибулаев, Интех Софт фирмадин иеси, физикадинни математикадин илимрин кандидат Мариф Къадимов квай. А.Баламирзоев ва комиссиядин членар са вахтунда МГУ акьалтIарнавай, къе республикадин гележегдин несил чирвилер ва тербия авайбур яз чIехи хьуник чпин лайихлу пай кутазвай кьегьалар я. Олимпиадада 16 аял 1-дережадин, 20 аял 2-дережадин, 14 аял 3-дережадин дипломриз, 28 аял грамотайриз лайихлу хьана. Гъалиб хьайи аялриз олимпиададин тешкилатчийрин патай премиярни гана. ЦIи олимпиададиз спонсорвилин куьмек гун патал А.Баламирзоеваз Сулейман-Стальский райондин кьил Н.Абдулмуталибова, Гь.Гьабибулаева куьмекна.
Ахцегь райондай ученикри и олимпиадада, вучиз ятIани, иштиракзавач. ЦIи лагьайтIа, са ученикни ракъурнач. И ва я маса райондин векилри олимпиадада иштирак тавуникай адан тешкилатчийриз къайгъу авач. Им абуру пул къазанмишда лагьана ваъ, аялрин гьевес хкажда, бажарагълубур хкяда лагьана, ватанпересвилин гьиссералди хсуси харжийрихъ ийизвай мергьяматлувилин кIвалах я. Амма бязи районра “Илимдиз кам” инкарзава.
Олимпиададин сергьятра аваз “Леки” фондунин тIалабуналди, Мариф Къадимова лезги ученикар ва абурун муаллимар патал “Халис инсан хьухь” лишандик кваз ачух тарсни тухвана.
Дагъви Шериф
