Зи хайи хуьруьн тарих — им адан бажарагълу рухвайринни рушарин баркаллу крар — бинеяр я. И крарик гъвечIи-чIехи гзафбуру чпелай алакьдайвал пай кутуна, хуьруьн тIвар хкажна. Гьахьтинбурун жергеда  Алимирзоев  Урдиханни  ава.

Ам 1909-йисуз дидедиз хьана. Хизан кесибди тир.  Дидени буба фад рагьметдиз фена. Урдихана са тике фу къазанмишун патал масабурун мал-къара хуьз, алакьдай кIвалахар ийиз хьана. Мектебда кIелиз алакьнач. КьатIунар, хци зигьин хьун себеб яз, Урдихана вичи-вичиз кIелиз чирна. Гьа са вахтунда хийирлу крарани иштиракна.

Гьа икI, жегьил гада яз, адаз колхозрикай, абурун къурулушдикай хабар, ахпа чирвилерни хьана. Иниз-аниз, машин — трактор авай чкайриз физ, гъилер, парталар ягъарай кьацIана хквез, ада вичиз машиндин кIвалах чирна. Эхирки, Урдиханакай шофер хьана.

Хуьре колхоз тешкилна 6 йис алатна. Урдихана Абасалиев Мегьемедагъадихъ галаз санал колхоздиз ХТЗ-трактор хкана. Кар алакьдай итим яз акуна, Урдихан КIварчагъа тешкилай колхоздин председателвиле кIвалахиз ракъурна.

Ватандин ЧIехи дяве башламишайла, жегьил председателни армиядиз фена. Техникадин  рекьяй алакьунар аваз акурла, адал женгинин машин ихтибарна, командирди ам вичин везифайрин гъавурда туна. Гьа сифте йикъарилай гатIунна, жавабдар ва чарасуз герек чкайрив Урдихана “Уралзисдалди” аскерар, суьрсет, яракьар ва маса лазим затIар агакьариз хьана. Ара-бир кьезил хирер жезвайтIани машинди хъсандиз къуллугъна. Урдихан вичин машинни гваз Берлиндин патарив агакьна. Къизгъин­ ягъунар физвай са арада адан машин бомбайрик акатна. Вич-вичел Урдихан госпиталда хтана.

Хирер сагъ хъхьайла, Урдихан Алимирзоев кIвализ рахкурна. 1946-йисуз ада колхоздиз полуторка машин хкана, адал кIва­лахна. Кьвед-пуд йисалай ам Кьасумхуьруьн МТС-диз механик яз кIвалахал кьабулна. Гьа са вахтунда ада “Рычал-су”-дин­ цехдани зегьмет чIугвазвай. Вичин уьмуьр Урдихана  техникадал кIвала­ху­низ бахшна, яргъал йисара бегьерлудаказ зегьметни чIугуна.

Райсудин Набиев