Дидедин суьгьбетрай чаз жуван ата- бубадин кьегьалвилерикай гзаф ван хьана. Са ата-буба ваъ, пуд авай кьван чахъ! Абурукай садни чан аламаз акунач.

Пуд стхани Ахцегь рай­ондин Ялцугърин хуьряй дяведиз фе­на. Сад-садан патарив гваз, абуруз чпи санал дяве тухузвайди чизвачир. Пудни Ленинграддин  фронтдин офицерар тир.

Виридалай чIехи стха — чи ата-буба, лейтенант  Гьабибов  Магьарам  Сафарович  батальондин комиссар тир. Гьабибов Буба- кьулан стха — старший лейтенант — пуле­мет­чикрин ротадин командир; гъвечIи стха Гьабибов Гьамидуллагь, старший лейтенантдин чинда аваз, автоматчикрин взводдин командир хьана. Абуру Ленинград душмандин гьалкъадай акъудзавай. Гьар сеферда женгиниз фидайла, офицерри мукьва-кьилияр, хайи ерияр ри­кIел хкизвай, ида абуруз къуватарни гузвай­.

Магьарам Сафаровичан викIегьви­ликай хуьре риваятар ама. Адаз мукьвал-мукьвал мектебдиз классдин сятериз теклифдай.

Февралдин вацран йикъарикай са юкъуз­, СССР-дин Яракьлу Къуватрин 50  йис жезвайла, “Дагестанская правда” газетдиз  дяведин корреспондент А. Донскоян “Ленинград хуьзвайди” кьил ганвай макъа­ла акъатна. Ингье адан куьруь мана-метлеб: “Им 1943-йисан мартдин вацра Ленинграддин фронтда хьайи вакъиа я. Ленин­град — Москва ракьун рехъ тирвал фашистрин чапхунчийрихъ галаз къизгъин женгер кьиле физвай. Нубатдин са женгина замполит Гьабибов вилик кваз физвай. Садлагьа­на кул-кусра адаз вич гъилин пулеметдин лишандик кутазвай немс акуна. Ада винтовка хкажна, амма душмандин  пулемет “рахана”. Бахтунай хьиз, политрукдихъ галукьнач. Замполитди нем­серал вегьена. Ада, цIайлапанди хьиз, гитлерчидал вегьена  немс гьанал секинарна. Гила адаз гъиле тапанчи авай фашистрин офицер акуна. Замполит вич-вичивай квахьнач, душман винтовкадин къундахдалди бушарна…”

Газетдин и чIук гилани хизандин альбомда хуьзва. Хуьруьнвийриз и макъалади екез таъсирнай. Абуру газет гъиляй-гъилиз вугузвай. Бубадин кьилив къвезвай мугьманри чухсагъулдин, шадвилин ва гьейранвилин гьиссер къалурзавай.

Са кьадар вахт алатайла, Гьабибов Магьараман тIварцIихъ КПСС-дин Лугадин горкомдин 1-секретардин чар хтана. Ингье адай са шумуд цIар:  “Ватандиз вафалувилин Куь чешнедалди,  чна жегьилар тербияламишзава. Вири крара абур кье­гьал­ ата-бубайриз, бубайриз, дидейриз ва вахариз вафалу  яз гьазурда. Лугадин чил душмандикай азад авунин активный иштиракчидиз чна рикIин сидкьидай чухса­гъул­ лугьузва…”

Гьар йисуз ата-буба Лугадин чилел ба­гьа мугьман хьиз физвай. Гьар йисуз майдин йикъара ам са полкуна хьайибурухъ галаз гуьруьшмиш жезвай.

Наргиз Агьмедова,
Арслан Гьабибов,
Мегьарамдхуьруьн райондин Советский хуьруьн юкьван школадин ученикар