Мукьвара Махачкъаладин 42-нумрадин школада лезгийрин машгьур шаир Лезги Няметан 90 йис тамам хьуниз талукьарнавай мярекат кьиле фена. Ана школадин 5-8-классра кIелзавай аялри ва ина зегьмет чIуг-вазвай лезги муаллимри — Рагнета Къадималиевади, Диляра Рефиевади, Оксана Нурметовади, Гуьлназ Бабаевади ва масабуру иштиракна.
Лагьана кIанда, 42-нумрадин школада лезги шаиррин юбилейриз талукь мярекатар тешкилун адетдиз элкъвенва. Шегьердин аялриз акьван хъсандиз дидед чIал чизвачтIани, абур ихьтин межлисривай яргъа жезвач, еке гьевесдалди анра иштиракзава.
Къейд ийин хьи, ихьтин мярекатар кьиле тухудайла, школадин завучар тир Эльвира Тажибовади, Саяд Загьировади чпелай алакьдай куьмекар гузва. Лезги Няметан шииратдиз талукьарнавай межлисда адан руш Севзиханова Гуьлпериди иштиракна.
Мярекатда Адилов Мулкихана, Рефиев Жабраила, Гьасанов Къадира, Абасова Исфахана, Агъамова Лауради, Абдурагьимова Марьяма, Зекеряева Радмилади эсерлудаказ Лезги Няметан шиирар кIелна, муаллимри шаирдин яратмишунрикай чпин фикирар, Гуьлпери Севзихановади вичин буба рикIел хкунай мярекатдин иштиракчийриз сагърай лагьана.
Мегьри Абдурашидова,
дидед чIалан муаллим
