Мартдилай майдалди гьар жуьре хуьрерай тир 300 аялди ял ядай йикъар СтIал Сулейманан райондин Цмуррин хуьруьн мектебдин мулкунал активнидаказ ва итижлудаказ акъудна. 11-16 йисарин яшара авай жаванар патал мярекатар мергьяматлувилин “Хуьр” фондунин “Активлубур — Акьуллубур — Ял ядай йикъар” программадин сергьятра аваз кьиле тухвана.
“Активлубур — Акьуллубур — Ял ядай йикъар” программадин серенжемрик акатзавай: “Архимед” паркуна ачух гьавадал экскурсияр ва тарсар; мектебдин теплицада кIвалахар (анра ботаникадин, биологиядин ва химиядин тарсара къачунвай чирвилер гьикI ишлемишдатIа суьгьбетзавай); веревирдер ийидай видеоклуб (фильмдиз килигун ва ам муаллимрихъ галаз веревирд авун); машгъулардай программированидай тарс; шикилар чIугунай мастер-классар ва “симерин искусство” техника чирун — гъаларикай ва еперикай нехишар, шикилар туькIуьрун.
Вири тарсар муаллимрин, пешекар инструкторрин ва волонтеррин командайрин иштираквал аваз кьиле тухвана.
“Аялвилин вахтунин виридалайни гужлу гьисс — дуьнья кьадарсуз зурбади яз ва ада жув патал агъзурралди мумкинвилер аваз акун. Гьа и фикир тир Цмурдал саки кьве вацра кьиле фейи мярекатрин бинеда авайди. Программадик гьар жуьре гьерекатар квай — спортдин рекьяй акъажунрилай башламишна, программированидай классрал агакьдалди. Гьаниз килигна, чун патални неинки аялар, гьакIни муаллимар гьевесламишун — чирвилер гунин гьерекатдив къугъунрин къайдада эгечIун гьикьван менфятлу ятIа къалурун важиблу тир”, — лугьузва “Хуьр” фондунин бине кутур Евгения Тюриковади.
“Активлубур — Акьуллубур — Ял ядай йикъар” программадин образованидин рекьяй нетижа СтIал Сулейманан райондин хуьрерин мектебрин директоррин иштираквал аваз кьиле фейи семинар хьана. Муаллимри чпин тежрибадикай лагьана — мектебрин арайра алакъаяр гьикI хуьдатIа, сергьятламишнавай мумкинвилерин шартIара къугъунрин къайдаяр гьикI вилик тухудатIа, тарсарин вахтунда интерактив артухардатIа.
“Чиниз, Цмурдал, са шумуд вацран вахтунда аялар ва абурухъ галай чIехибур къвез хьана. Чи ял ядай йикъарин программа интерактивный тарсарикай ибарат тир. Анра чна образованидин алай аямдин къайдаяр ишлемишзавай. Мярекатрин программади сада масадан тежрибадикай менфят къачудай, пешедин рекьяй алакъаяр тайинардай ва, гьелбетда, вахт менфятлудаказ акъуддай мумкинвал гана. Идалай кьулухъ чна и мектебрихъ галаз онлайн-къайдада алакъаяр тайинарун ва хуьн пландик кутунва”, — лугьузва Цмуррин СОШ-дин директор Сергей Ежова.
СтIал Сулейманан райондин образованидин управленидин начальник Гьуьсейн Шихбабаева хабар гайивал, “Активлубур — Акьуллубур — Ял ядай йикъар” программадин мярекатра Кьиблепатан Дагъустандин муьжуьд муниципалитетдай тир аялри иштиракна.
“Къейдна кIанда, программа неинки образованидин тарсаралди — программированидайни, биологиядайни, яратмишунрин тарсарни хьана, — девлетлу тир, ина гьакIни спортдин ва машгъулардай мярекатарни кьиле тухвана. Жуван ва райондин образованидин управленидин патай заз Президентдин грантрин фондуниз ва Цмуррин школадин коллективдиз чухсагъул лугьуз кIанзава”, — лагьана ада.
«Лезги газет»
