Мукьвара Рязань шегьерда Россиядин здравоохраненидин министерстводин кIвенкIвечивал патал дзюдодай уьлкведин медицинадин ва фармацевтикадин вузрин студентрин арада VI чемпионат кьиле фена. Ана Рязандин, Дагъустандин, Москвадин, Башкортостандин, Ижевскдин, Тюмендин, Кубандин, Ставрополдин, Саратовдин ва Казандин вузра кIелзавай 70-дав агакьна спортсменри иштиракна. Абуру заланвилин 11 категориядай бягьсера чпин устадвал къалурна.
Чемпионатда 73 килограммдал къведалди заланвал авайбурун арада майдандиз В.И.Разумовскийдин тIварунихъ галай Саратовдин медицинадин университетдин стоматологиядин факультетдин 5-курсунин студент, ери-бине Кьасумхуьрелай тир Гьажирамазан Ягъибегов экъечIна. Ада Кубандин, Тюмендин медуниверситетрин ва Ижевскдин медакадемиядин студентрал-спортсменрал инанмишвилелди гъалибвал къазанмишна. Финалда чи ватанэгьли Ставрополдай тир къуватлу спортсмендихъ галаз “гуьруьшмиш хьана”. Бягьсинин асул вахтунда гъалибчи тайинариз хьанач, кьведахъни сад хьтин баллар авай. Алава вахтунда Гьажирамазан гъалиб хьана.
Гь.Ягъибегова Кьасумхуьрел кардик квай самбодинни дзюдодин ДЮСШ-да тренерар тир Рамазан, Юрий ва Тельман Къурбановрин гъилик вердишвилер къачуна. Ам Дагъустандин кIвенкIвечивал патал ва Вирироссиядин хейлин турниррин гъалибчи ва призер я. Алай вахтунда Гь.Ягъибегова университетда физвоспитанидин кафедрадин старший преподаватель Николай Клюшникован ва кафедрадин заведующий Михаил Фоминан гъилик устадвал хкажзава.
Чаз Гь.Ягъибеговахъ кIелунра ва спортда мадни еке агалкьунар хьана кIанзава.
Хазран Кьасумов
