И йикъара дагълух Къурушрин хуьре, Сив хуьнин сувариз ва общественный деятель Нажмудин Самурскийдин экуь къаматдиз бахшна, спортдин са шумуд жуьредай нубатдин, гила 5-сеферда, турнир кьиле тухвана. Хуьруьн администрациядин кьилин, школадин директордин куьмекни галаз ам тешкилнавайбур акьалтзавай несил сагъламди хьунин къайгъуда авай ксар ва спонсорар тир.
Турнирда Махачкъаладай, Дербентдай, Къуйсундилай, Герейханован совхоздилай, Ярагъ-Къазмайрилай, Миграгъай, гьакIни Къурушдилай тир 90-дав агакьна ксари, гьа гьисабдай яз 70-далай виниз школьникри иштиракна.
Къизгъиндаказ кьиле фейи акъажунрин нетижада командайрин арада 1-чкадиз 63 балл къазанмишай Къурушрин команда лайихлу хьана. Миграгъай ва Дербентдай атанвай командайри сад хьтин кьадар — 54 балл къазанмишна.
КIвенкIвечи чкаяр кьур вири командайриз медалар, футболкаяр ва пулдин пишкешар гана.
Фейруз Къулиев
