Ислендиз РД-дин Кьил Сергей Меликова “Управление федеральных автомобильных дорог “Кавказ” Федерального дорожного агентства” ФКУ-дин (Упрдор “Кавказ” ФКУ) начальник Александр Лукашукахъ галаз гуьруьш кьиле тухвана. Абуру республикадин транспортдин къурулушдиз талукь месэлаяр веревирдна.
Къейд ийин хьи, 2022-йисуз Упрдор “Кавказ” ФКУ-ди кьил кутуналди, Дагъустандин мулкарилай физвай Р-217-нумрадин федеральный дережадин шегьре рекьин са шумуд участокда цIийикIа туькIуьр хъувунин кIвалахар гатIуннава. Ихтилат Хасавюрт, Избербаш шегьерриз, Мамедкъала поселокдиз мукьва участокрикай ва Эндирей-Куьгьне Бавтугай, Учкент-Коркмаскъала, Къаякент-Жемикент рекьерикай физва. 2023-йисан эхирдалди и рекьерин 53 километр, 2024-йисуз 25 километр цIийикIа туькIуьр хъувуна акьалтIарда. Нетижада винидихъ тIвар кьур шегьре рекьин республикадин мулкарилай физвай 271 километрдикай 140 километр 4 зулуникай ибарат жеда.
Гуьруьшдал А.Лукашука къейд авурвал, шегьре рехъ 4 зулуникай ибарат хьуни, республикадин экономика вилик финиз таъсир авунилай гъейри, рекьерин гьерекат хатасуз ийизва. 2 полоса са патай, гьакьван муькуь патайни хьуни аварияр арадал атунин вилик пад кьада. Шегьре рекьин цIийикIа туькIуьр хъийизвай участокар авай шегьерра, хуьрера рекьин къерех тирвал аваданлу авунин кIвалахарни кьиле тухудайвал я.
«Лезги газет»
