31-майдиз РД-дин Гьукуматдин Председатель Абдулмуслим Абдулмуслимован регьбервилик кваз республикада як гьялдай “Дагмясо” ООО-дин дарамат эцигунин месэлайриз талукьарнавай совещание кьиле фена.
“Лезги газетдиз” Дагъустандин Гьукуматдин пресс-къуллугъди хабар гайивал, дарамат эцигун патал Къизилюрт райондин Кульзеб хуьруьн мулкарал 20 гектар майдан чара авунва. “Дагмясо” ООО-дин учредитель “Корпорация развития Дагестана” АО я. Эцигунрин кIвалахриз герек пулунин такьатар республикадин бюджетдай ва инвестордин гьисабдай чара ийида.
ЦIийиз арадал гъизвай комбинатдин гужлувал, гьакъикъатдани, гьейран жедайди я: са сменада 700 — куьлуь ва 50 чIехи карч алай гьайванрин як гьялун фикирдиз къачунва. ЯкIун суьрсет гьялунилай гъейри, карханада гьайванрин хамарни гьялда,тумаж арадал гъида.
А.Абдулмуслимован фикирдалди, и проектдихъ республикадин экономика вилик финин рекье еке метлеб ава. Карханадин надирвал адакай ибарат я хьи, як гьялунилай гъейри, ана жуьреба-жуьре маса суьрсетни арадал гъида.
Проект кьилиз акъудун патал РД-дин чилин ва эменнидин алакъайрин, хуьруьн майишатдин ва суьрсетдин, эцигунрин, архитектурадин ва ЖКХ-дин, энергетикадин ва тарифрин, карчивилин ва инвестицийрин рекьяй кардик квай Агентстводин ва маса ведомствойрин векилрикай ибарат махсус десте арадал гъанва.
«Лезги газет»
