Инсанрин къилихар хьиз, абуру хкязавай пешеярни жуьреба-жуьре я. Уьмуьрда вичин пеше рикIин эмирдалди хкягъай инсанрикай яз, завай Цмуррин хуьруьн библиотекадин заведующий Агъабегова Шагьзада Абдулашимовнадин тIвар кьаз жеда. И гуьзел хуьруьн библиотекадин кIвалахдикай газетдиз макъала кхьин заз цмурвийри меслятна.
— Гьакъикъатдани, Шагьзада вах вичиз тIебиатди кьетIен пай, бажарагъ ганвай инсан, хъсан пешекар я, — лагьана чаз хуьруьн администрациядин кьил Раида Алибеговади. — Ам хьиз халкьдин къуллугъда акъвазнавай, кIвалахзавай инсанар гьар са хуьруьн дамах я. Ам вичин пешедал, кIвалахдал кьару я, жемятдини адаз гьуьрметзава.
Ингье зун хуьруьн библиотекада ава. Экуь, михьи, гьар са шей къайдадик кваз эцигнавай библиотекада са шумуд кас столрал алай газетар, журналар кIелунал машгъул тир. Абурун къуллугъда Шагьзада Агъабегова акъвазнава. И везифа ада Махачкъалада культпросветучилищедин библиотекайрин отделение акьалтIарай 1985-йисалай кьиле тухузва.
Библиотекадин цларал алай гьар са стенд са низ ва квез ятIани талукьарнава, чебни гуьрчегдаказ, лугьудайвал, виле акьадайвал туькIуьрнава.
— Цмуррин хуьруьхъни, хуьруьнвийрихъни дамахдай крар, баркаллу тарих, адетар ава, — лугьузва Шагьзада Абдулашимовнади. — Абур чна къвезмай несил патал хуьн лазим я. Чна гьазурнавай стендрин асул метлебни гьам я.
Библиотекада лезги литературадин классик Алибег Фатагьоваз, СтIал Сулейманаз, 1948-йисуз Урусатдай атана, Цмуррин школада муаллимвиле кIвалахай Тамара Растегаевадиз (Алибеговадиз), генерал-майор Мегьамед-Гьанифа Шайдаеваз талукьарна акъуднавай, гьакIни “Хуьруьн тарих”, “Цмурвияр — дяведин ветеранар”, “Чи генералар” ва маса стендар гьар са касдин фикир желбдайбур, итижлу ва тайин делилар авайбур хьанва.
Шагьзада Агъабеговади чаз лагьайвал, алай вахтунда библиотекада 4990 ктаб ава. Абур кIелзавайбурун кьадар 240 касдилай виниз я.
Идалайни гъейри, библиотекада лишанлу йикъариз талукьарнавай мярекатар, кIелзавайбурухъ галаз конференцияр, райондин яратмишдай интеллигенциядин векилрихъ, хуьряй акъатай машгьур инсанрихъ, ветеранрихъ галаз гуьруьшарни мукьвал-мукьвал кьиле тухузва. Шагьзада Абдулашимовнади лугьузвайвал, и карда хуьруьн поселенидин администрациядин кьил Раида Алибеговади, школадин директор Сергей Ежова, хуьре кардик квай Гъалибвилин музейдин директор Нариман Агъабегова, 51 йисуз клубдин заведующийвиле кIвалахзавай Мусинат Нуралиевади гузвай куьмек екеди я.
Шагьзада Агъабеговадин яргъал йисарин намуслу зегьмет райондин культурадин отделдин, центральный библиотечный къурулушдин, мергьяматлувилин “Умуд” фондунин патай гьуьрметдин грамотаяр, пулунин премияр гуналди къейднава.
— Хуьруьнвийрин къуллугъда акъвазун, библиотекадиз атай гьар са кас рази яз хъфин — им зун патал виридалайни чIехи пишкеш я, — лугьузва кIвалахди руьгьдин таъминвал гузвай Ш.Агъабеговади.
Хазран Кьасумов
