Вад-ругуд йис идалай вилик кардик акатай Россиядин Федерациядин халкьарин милли эдебиятриз куьмек гунин программадин сергьятра аваз алатай йисан эхирра Москвада чапдай акъатай “Художественный публицистика” чIехи антологияда лезги писателар, публицистар тир Мердали Жалилован, Мариф Къадимован, Азиз Мирзебегован, Арбен Къардашан эсерар гьатнава.
Энциклопедиядин жуьредин еке кIалубда аваз, 680 чиникай ибарат яз акъатнавай ктабда Россиядин алай аямдин эдебиятдин 45 векилди кхьенвай, урус чIалаз таржума авунвай 134 автордин, гьа жергедай яз Дагъустандин къелемчийринни, публицистикадин эсерар гьатнава. Эсеррин мана-метлеб асул гьисабдай Россиядин халкьарин художественный публицистикадин тарихдикай, алай девирда ам авай гьалдикай, авторрин куьруь биографийрикай ибарат я.
Ктабди кIелдайбурун гегьенш къатар Россиядин алай аямдин публицистикадихъ, эдебиятдихъ галаз танишардай хъсан мумкинвал гузва.
Антологиядин 337-354-чинар лезги машгьур къелемчийрин публицистикадин эсерри кьунва. И пай Мердали Жалилова лезги публицистикадин тарихдикай кхьенвай макъаладилай гатIунзава. Авторди тестикьарзавайвал, лезги публицистикадин тарих 2020-йисуз виш йисан юбилей хьайи “Лезги газетдихъ” галаз алакъалу я.
Кьилди къачуртIа, ктабда кIелдайбуруз М.Жалилован фельетонар, М.Къадимован насигьатдин гьикаяяр, А.Мирзебегован “Французрин писателдин эсерра лезгийрин къаматар”, А.Къардашан “Сулейманан тикрарсузвал” макъалаяр ва маса эсерар теклифнава. Им авторриз, лезги эдебиятдал рикI алай вирибуруз тебрик ийиз жедай агалкьун я.
Редакциядин советдик лезгийрикай Дагъустандин халкьдин писатель А.Исмаилов, Дагъустандин халкьдин шаирар тир А.Къардаш, Х.Хаметова ква.
Къейд ийин, тIвар кьунвай программадай идалай виликни жуьреба-жуьре жанрайриз талукь кьуд антология акъатнава. 2017-йисуз акъатай шииратдин еке антологияда Дагъустандин халкьдин шаир Х.Хаметовадин, Дагъустандин халкьдин писатель А.Исмаилован, шаир ва публицист Ф.Нагъиеван, Дагъустандин халкьдин шаир А.Къардашан, шаир ва эдебиятчи А.Мирзебегован шиирар гьатнава. Гьа и жуьредин гьикаятдин эсерар авай антологияни акъатнава.
А.Къардаша ихтилат авурвал, антологиядик кутазвай эсерар хайи ва урус чIаларал кхьенвайбур хьана кIанзава. “Художественный публицистика” ктабда гьар са миллетдин кесерлу кьудалай артух тушиз авторриз чпин эсерар вугудай мумкинвал ганвай.
Алай вахтунда “Халкьдин камал” тIвар алаз Россиядин халкьарин мисалрин антология туькIуьрзава.
К. Ферзалиев
