Етим Эмин вичин девирдин лайихлу, савадлу ва адалатлу инсан хьана. Ам халкьдиз гзаф сейли я. Чlехи урус халкьдин эдебиятдин классикри чпин чlалан девлетлувални къешенгвал гьикl къалурнатlа, Етим Эминани чи хайи чlалан сергьятар гегьеншарна ва вири девирра къиметлу яз амукьдай жавагьирралди шииратдин бине эцигна.

Етим Эмин кьилди са алем илим, шиират я. Эдебиятдал машгъул гзаф алимри адан яратмишунрикай кхьенва. И кlвалах чи йикъарани давам жезва. Адан цlийи чlалар жагъин хъийизва, таржума ийизва, чапдай акъудзава ва икl мад.

Эминан шииратда кlелчийрин гегьенш къатариз малум тушир гафарни тlимил авач. Виридаз таниш тир малуматрай аквазвайвал, ам са шумуд чlалал савадлу тир. Гьавиляй адан яратмишунра чаз са акьван малум тушир гафарни самбар хьун тlебии кар я.

Гьайиф къведай кар ам я хьи, алай вахтунда чи классикрин шииратдин чlал, чпихъ пешекарвал авачиз, “туькlуьр” хъийидайбур, и ва маса устаддин яратмишунар гьатта “цlийи чlалал” чапдай ахкъуддайбурни пайда хьанва. И месэла неинки Етим Эминаз, гьакl маса устадрин чlаларизни талукь я.

Чlалан тlебиивилиз, кьетlенвилиз акси гьерекатар ийиз тан тийин, анжах виликди тухудайвал, сергьятар мадни гегьеншардайвал ийин.

Куругъли Ферзалиев