19-апрелдиз Мегьарамдхуьруьн райондин медениятдин дараматда Етим Эминан 180 йисан юбилейдин сергьятра аваз Мегьарамдхуьруьн, Сулейман-Стальский, Докъузпара, Ахцегь, Кьурагь, Хив районрин яратмишзавай интеллигенциядин векилрин II форум кьиле фена. Ихьтин метлеблу мярекат тешкилайбур Сулейман-Стальский райондин “Куьредин ярар” центр, Мегьарамдхуьруьн райондин медениятдин управление ва райадминистрация я.
Эдебиятдин межлисдин макьсадрикай, иштиракчийрикай куьрелди ихтилат авурдай кьалухъ А.Камилова сифте гаф Мегьарамдхуьруьн райондин кьилин заместитель Ариф Гьажиеваз гана. Ада мярекатдик кьил кутурбуруз, лезги эдебиятдиз, медениятдиз къуллугъзавайбуруз чухсагъул лагьана. Вичин рахунар ада Етим Эминан шиир кlелуналди акьалтlарна.
Гуьгъуьнлай Ярославль шегьердай хтанвай писатель, таржумачи Мамед Халилова эдебиятдин рекье кьиле тухванвай кlвалахрикай ва гележегдин фикиррикай ихтилатна. Кьилди къачуртlа, ада алатай йисуз маса халкьарин векилрихъ галаз эдебиятдин уртах тешкилат арадал гъанвайдакай, алай вахтунда Фейзудин Нагъиеван, Зульфикъар Къафланован эсерар урус чlалаз таржума авуна, кlватlалар гьазурзавайдакай ихтилатна. М.Халилова штиракчияр вичи лезги чlалай урус чlалаз таржума авунвай Саират Агьмедпашаевадин рубаийрин ктабдихъ галазни танишарна.
Мярекатдал Ф.Насрединов, Загьир Жамирзоев, Максим Алимов, Агьмедпаша Агьмедпашаев, Эминат Алиева, Саласа Гьажиметова, Демирбег Эмирбегов, Сулейман Пашаев, Ширинагъа Сулейманов, Афисат Алимирзоева, Айнар Шалбузова, Райсудин Набиев, Эйзудин Сайдумов, и цlарарин автор, Вадим Жамалдинов, Эседуллагь Селимов ва масабур рахана.
Къейд ийин, чкадин манидаррин дестеди, кьилди къачуртlа, Билал Эскендарова, Назиля Саидалиевади, Седакъет Саидовади Етим Эминан чlалариз кхьенвай манияр тамамаруналди, Филерин хуьруьн мектебдин аялри Етим Эминан шиирар кlелуналди эдебиятдин мярекатдин иштиракчийрин гуьгьуьлар шадарна.
Эхирдай “Куьредин ярар” медениятдин макандин председатель А.Агьмедпашаева халкьдиз, ватандиз намуслувилелди къуллугъ авунай, эдебият, меденият вилик тухунин кардик кьетlен пай кутунай бязи иштиракчийриз гьуьрметдин грамотаяр гана.
Куругъли Ферзалиев
