Къейд.
Ибрагьим Мегьамедов цIаяр хкадардай къуллугъчидин хизанда дидедиз хьана. Ахцегьрин школа акьалтIа-рай ам вуздик экечIна ва, 4-курсуниз акъатайла, хайи хуьре цIаяр хкадардайбурун къурулушда кIвалахиз башламишна. КIелна куьтягьай, тежрибани авай жегьил пешекар 2001-йисуз армиядин жергейриз фена. Хтайла, мад пожарныйвиле кIвалахиз хьайи зур йисалай Ибрагьим отделенидин командирвиле тайинарна. 2009-йисалай офицер частунин начальникдин заместитель хьана. И.Мегьамедова вичин чирвилер хкажун патал Санкт-Петербургдин госуниверситетдин Махачкъалада авай филиалда цIаяр кьуникай хуьнин пешедай кIел хъувуна. Са тIимил вахтундилай ам Россиядин МЧС-дин къаюмвилик квай “РД-да авай цIаяр кьуниз акси федеральный къуллугъдин отряд” ФГКУ-дин 6-нумрадин частунин начальниквилин везифайрив гатIумна. 2013-йисалай Ибрагьим Мегьамедов Кьурагь районда авай частунин начальниквиле тайинарна.
Кьурагьиз фидай рекьин чапла пата, дагъларин къужахда авай майдандал, емишдин багъдин юкьва цIаяр хкадардайбурун гуьрчег дараматди гьар садан фикир вичел желбда. Им 2013-йисуз ишлемишиз вахкай “РД-да авай цIаяр кьуниз акси федеральный къуллугъдин отряд” ФГКУ-дин 18-нумрадин частунин дарамат я. Кардик акатай сифте йикъалай адаз къенепатан къуллугъдин капитан Мегьамедов Ибрагьим Рауфовича регьбервал гузва ва цIаяр хкадардай, агьалияр къутармишдай 25 пешекардикай ибарат гьуьрметлу коллектив Курагь районда активнидаказ чпин везифайрив эгечIна. Отряддихъ цIаяр хкадарун патал яд тухудай махсус кьве ва гъвечIи са улакь, герек вири тадаракар ава. Ина гьакIни газдикай гумадикай хуьдай, техникадин ва профилактикадин къуллугъар кардик ква. Коллективди райондин общественный уьмуьрда, республикадин спортдин мярекатра иштиракзава, сифтегьан чкаяр кьазва. Чна Ибрагьим Мегьамедовахъ галаз адан зегьметдин рекьикай, цIаяр хкадардайбурун пешедикай суьгьбетарна.
— Куьне цIаяр хкадардай — къутармишдай пеше хкягъунихъ себеб ава жеди?..
— ГъвечIи чIавалай гьар сада гележегдин пешедикай фикирарда, и ва я маса пеше хкяда. Гзаф дуьшуьшра ам телевизордай бегенмиш хьайи ва я бубадин пешедихъ галаз алакъалу жеда. Ахцегьа пожарный часть кардик акатай 1984-йисалай инихъ къад йисан вахтунда анин начальник хьайи бубадин пеше къе за давамарзава.
— Пожарный охранадин къуллугъчидиз гьихьтин ерияр хас я?
— Чун, дагъвияр, масадан гьарайдиз гьай лугьудай, куьмекдин гъил яргъи ийидай ксар я. Зи фикирдалди, цIаяр хкадардайбурун, къутармишдайбурун пешедин кьилин ери гьа им я. Алава яз, къуллугъчидин беден сагъламди хьун, гьар са дуьшуьшда ада, кенефдин кьил квадар тавуна, вуч авун герек ятIа фикирна кIвалахун — инсанар, объектар къутармишун лазим я. Чи кIвалахда гьар жуьредин бедбахтвилер, дуьшуьшар гьалтзава кьван.
— Къурулушдин векилринни чкадин агьалийрин арада гьихьтин рафтарвилер ава?
— Чун гьар са дуьшуьшда агьалийриз къуллугъиз гьазур къурулуш я. Къуй бедбахтвилер тахьурай! Вилик пад кьунин кIвалахарни чи къуллугъчийри вахт-вахтунда тухузва. Чкайрал гьар са коллективдихъ галаз гуьруьшмиш жезва, гъавурдик кутунин суьгьбетарзава. Школайра кIелзавай аялриз, частуниз гъана, сейрарни тешкилзава.
— Районда цIаяр кьунин бедбахтвилер гзаф жезвани?
— КIвалери цIаяр кьур дуьшуьшар лап тIимил я. 2013-йисалай 5-6 кIвалик цIай акатна. Векьери, затIар хуьзвай чкайри цIаяр кьунар жезва. Гьар сада мукъаятвал авун, къуншидикайни фикирун герек я. Хуьрерин куьгьне паяра, яни кIвалер лап сад-садан патав эцигнавай чкайра, агьалияр иллаки мукъаят хьун герек я.
— Мумкинвиликай менфят къачуна, газет кIелзавайбурухъ элкъвена вуч лугьуз жеда?
— ЦIуз зун-вун, кIвал-идара, кьуьд-гад чидач. Мукъаятсуз хьайида, техникадин жигьетдай хатасузвал таъминар тавурла, са гъвечIи гъалатI ахъаяйлани, аялрин гъиле спичка хьайилани, еке бедбахтвилер, цIаяр кьунар арадал къведа. ТIебиатдал ял ягъунин вахт мукьва хьанва. Мукъаят хьун, цIаяр хкадарун, цIивинар, цIай кьадай шейэр кIватI хъувун герек я. ЦIай кьур дуьшуьш хьайитIа, гьасятда пожарный къурулушдиз зенг авуна, тIвар, фамилия, чка, гьалар гьихьтинбур ятIа лугьун лазим я. Тапан зенгер тавурай. Ахьтин са “зенгинал фейи” чун цIай кьур масанив агакь тахвун мумкин я.
Суьгьбетрик кваз чун частунин сергьятрани къекъвена. Дараматдихъ цуьк акъуднавай хъсан багъни гала. Ам багъманчивилел рикI алай частунин регьбердин агалкьун я. 2014-йисуз Ибрагьим Мегьамедова Ахцегьай, Мегьарамдхуьряй ва масанрай гьар жуьредин сортарин емишрин къелемар гъанай ва частунин дараматдин гьаятда цанай. Частунин къуллугъчияр кIвалахдикай азад вахтунда тарарихъ гелкъвезва. Багъди бегьерни гъизва. И кардал аниз атай гьар сад гьейран жезва. Гила цIаяр кьуникай къутармишдайбурун емишдин багъдилай чешне, абурувай меслятар къачуна, хсуси багълар кутазвайбурни ава.
ЦIаяр кьуникай хуьдай вири къуллугъчийриз чна пешекарвилин югъ-сувар мубаракзава. Къуй бедбахтвилер тахьурай, цIаяр кьуникай къутармишдайбуру агьалийриз маса кIвалахра куьмекар гуда.
Эмираслан Шерифалиев
