И йикъара республикадин  мектебра “Эхиримжи зенгинин” сувар кьиле фена.  Алай йисуз республикада, санлай къачурла,  кIуьд лагьай классрин  36,5 агъзур ва цIусад лагьай классрин 11,5 агъзур жаванри мектебар акьалтIарна.

РД-дин образованидин ва илимдин министр Ягья Бучаева и сувар  Каспийск шегьерда авай республикадин образованидин центрадин выпускникрихъ галаз санал къаршиламишна.

“Квез куь уьмуьрдин виридалайни еке хазина — чирвилер ганвай ксарал рикI ва  абурун къиметлувал чир хьухь. И хазина уьмуьрдин рекьерай твах, ам мадни артухара ва къвезмай несилрив агакьара. Куь вилик еке, гегьенш рекьер ква. Абурай­ фидайла, квез мектебда кIватIнавай ягъал­миш тежер чирвилери ва тежрибади куьмекда. Куь уьмуьрда гьеле гзаф им­ти­гьанар  жеда. Четин уламрай гъетерихъди чIугу — дамахдивди, намусдивди”, — ла­гьана министрди мектеб акьалтIар­за­вай­бурухъ, гьакIни республикадин вири выпускникрихъ  элкъвена.

Алай йисан 21-майдиз “Эхиримжи зенг” Мегьарамдхуьруьн райондин мектебрани яна. Вири школайра шад мяре­катар­, линейкаяр кьиле фена. Абура райондин администрациядин ва образованидин управленидин векилри иштиракна,  уьмуьрдин вини дережадиз кам къачуз­вай­  жегьи­лар гьевесламишдай алхишар авуна. Райондин выпускникриз, абурун диде-бубайриз ва муаллимриз тебрикдин, гьакIни нетижаяр кьадай имтигьанрин вахтунда агалкьунар хьунин келимаяр райондин кьил Фарид Агьмедовани лагьана.

И йисуз  Мегьарамдхуьруьн райондин школаяр 796 выпускникди акьалтIарнава. 240 жегьилди — 11-классар, 656-да — 9-классар. Абурун арада Билбилхуьруьн-Къазмайрин М.Абдуллаеван тIва­рунихъ галай юкьван мектеб акьал­­тIарнавай  жегьиларни ава. Райондин мектебрин арада Билбилхуьруьн СОШ кьетIендаказ къейд авунин себеб ам я хьи, алатай асирдин 30-йисара хуьруьн жемятдин къуватдалди эцигай дараматда кIелзаватIани, ая­лар патал жезмай кьван къулай шар­тIар тешкилиз алахънавай  руководстводин  ва савадлувилин виниз тир  дережадин  муаллимрикай — халисан пешекаррикай  ибарат коллективдин алакьунралди мектебдин аялри неинки райондин, гьакIни республикадин олимпиадайра активнидаказ иштиракзава, виниз тир чкаяр кьазва.  Мек­тебда аялрин уьмуьр жезмай кьван итижлуди хьунин,  ватанпересвилин, элкъуьр­на кьунвай тIебиат хуьнин, абур вири патарихъай чирвилер авай, дуьзгуьн вердишвилер къачунвай несил яз чIехи хьунин месэлайриз кьетIен фикир гузва.

Билбилхуьруьн СОШ-дин суварин мя­рекат Россиядин гимн ягъуналди ва ди­рек­тор Тимур Мурадович Саидова выпуск­никриз сувар тебрикуналди ачухна. “Мектеб акьал­тIарун — им гьар са касдин уьмуьр­да важиблу дережа я. Куьн вири ма­садан куьмек­ галачиз кьиле тухун лазим тир  уьмуьрдин ракIарив агакьнава. И уьмуьр­да  жуван чка жагъурун патал куь вилик гьар жуьредин мумкинвилер  ачух жезва. Гьикьван куьн гьевеслу, къастунал кIеви ва хкянавай рекьихъ инанмиш хьайитIа, гьакьван вини дережайривни агакьда.  “ЧIехи” уьмуьрда дуьз рекье аваз фин па­тал школади куьн гьазурнава. Югъур­ хьуй квез!” — лагьана ада.

Чими келимаяр  аялриз мярекатдин мугьман, машгьур политолог ва журналист Руслан Къурбановани, атанвай маса мугьманрини  лагьана.

Гуьгъуьнлай директорди кIелунин йисан вахтунда агалкьунар хьайи аялрив пишкешар ва грамотаяр вахкана. Сад лагьай классда кIелзавай  аялри выпускникриз  тебрикарна, цуьквер гана. Линейка, адет хьанвайвал, шиирар кIелуналди, ма­нияр лугьуналди, лифер ахъаюналди, кьуьлер авуналди давам хьана.

Выпускникрин вилик имтигьанрин муракаб вахт ква. Къейд ийин, 2022-йисуз Государстводин сад тир экзамен 11-классар акьалтIарнавай вири аялри  — вузрик экечIиз кIанзавайбуруни вахкуда.

ИкI, сад лагьай ЕГЭ — географиядай, ли­тературадай ва химиядай — 26-майдиз кьиле фида. 30 ва 31-майдиз — урус чIалай, 2 ва 3-июндиз — математикадай, 6-июндиз — физикадай, тарихдай, 9-июндиз — общест­вознанидай, 14-июндиз — къецепатан чIа­ла­рай ва биологиядай, 20 ва 21-июндиз информатикадай имтигьанар кьиле тухуда.

Амина Муслимова