Алатай ислендиз, 23-майдиз, Вирироссиядин “Онкопатруль” акция Дагъустанда кIвалахдив эгечIна. Чи республика онкологиядихъ галаз женг чIугвадай десант кьабулнавай 16-регион я. ИкI, Россиядин Минздравдин кьилин онколог Андрей Каприн кьиле авай Минздравдин радиологиядин НМИЦ-дин кар алай пешекаррин чIехи дестеди Дагъларин уьлкведа тамам 5 юкъуз кIвалахда: медицинадин рекьяй ахтармишунар, чирвилер гудай семинарар, мастер-классар, студентрихъ галаз гуьруьшар, онкомаммологиядай ва онкогинекологиядай операцияр кьиле тухуда.
— “Вирироссиядин “Онкопатруль акция”, вичин гегьеншвилел ва азаррин вилик пад кьунин важиблувилел гьалтайла, кьетIен мярекат я. Адан сергьятра аваз кьиле тухузвай серенжемрин нетижада неинки онкологиядин азарар фад дуьздал акъуддай мумкинвал гузва, гьакIни онкология (чIуру дакIунар) сифтеда амаз дуьздал акъудун патал медицинадин жуьреба-жуьре хилерин пешекаррин чирвилер, алакьунар ва устадвал хкажзава. Дагъустанда, уьлкведин ва республикадин кьиле авай ксарин куьмекни галаз, онкоазаррикди рекьизвайбурун кьадар яваш-явашдиз тIимилариз алакьзава. И жигьетдай федеральный экспертрихъ галаз санал кIвалах активнидаказ давамарзава. Республикадин онкологиядин центради ачух йикъар кьиле тухунин нетижада чIуру дакIунар фад дуьздал акъуддай мумкинвал гунихъ Россиядин дережада лайихлувал къазанмишнава, -къейдна РД-дин здравоохраненидин министр Татьяна Беляевади.
Дагъустанда чIуру дакIунар авай ксар 5 йисалай виниз яшамиш хьун ва азарар фад дуьздал акъудун артух, азар акатай инсан са йисан вахтунда кьинин дуьшуьшар тIимил хьанва. Ибур хъсан патахъ дегишвилер жезвайди къалурзавай лишанар я. 2021-йисуз “Здравоохранение” милли проектдин сергьятра аваз РД-дин “Онкологиядин азаррихъ галаз женг чIугун” региондин проектдин тайин макьсаддихъ элкъуьрнавай са жерге крар кьилиз акъудиз алакьна.
Федеральный экспертри къейдзавайвал, эхиримжи йисара онкологиядин центрадин патав алава дарамат (корпус) — са сменада 200 кас кьабулдай ва 40 чарпай авай стационар галай поликлиника ачухуни, анаг цIийи тадаракралди таъминар хъувуни, республикада онкологиядикди азарлуйриз куьмек гудай амбулаторный центраяр ачухуни ва маса серенжемри онкокъуллугъдин кIвалах хейлин хъсанарнава. Амма гележегда мадни вилик тухун лазим жезва.
Республикадин онкоцентрада Москвадин хирургри Дагъустандин пешекаррихъ галаз саналди кьетIен жуьредин операцияр кьилиз акъудда. Идалайни гъейри, хирургар-онкологар патал мастер-классар ва здравоохраненидин сифтегьан хилен духтурар патални семинарар тухудайвал я.
«Лезги газет»
