Эхиримжи зенг аялрин уьмуьрда виридалайни рикIелай алат тийир хьтин гуьзел сувар я. Шадвилихъ га­лаз санал “эхиримжи” гафуни мектеб акьалтIар­завай жегьилрин рикIе­ра са гьихьтин ятIани  пе­ри­шан фикирарни твазва. ЦIусад йисуз санал са классда шаддиз, гьуьр­мет­луда­каз­ хьайибур садлагьана къа­къат­зава эхир. Бязи аялринни муаллимрин вилер разивилин, ре­гьимлуви­линни хушбахтвилин накъ­ва­рив ацIунни тIебии я. Эхь, гьа ихьтин на­къвар чаз 22-майдин юкъуз Ахцегь райондин чирвилерин мектебрин эхиримжи зенгерин суварин иштиракчийрин вилерални акуна­.

Эхиримжи зенг инсандин уьмуьр­да, гуя къайгъусуз аялвал къакъудна­, чIехи­бу­рун че­тин ва жавабдар уьмуьр­­диз кам вегьин ли­шанла­миш­завай кье­­тIен вакъиа — эхиримжи ачух тарс я. Мектеб акьал­тIар­завай же­гьил­рин ва партайрихъ сифте яз ацукь­за­вай гъвечIи аялрин бейнида яргъалди амукьун патал адаз виликамаз гуьзелдиз гьазур хьун хъсан адетдиз эл­къвен­­­ва­. ГьакI гьазурвал ва вини дере­жадин теш­киллувал аваз кьилени тухвана цIи Ах­цегь район­дин юкьван чирви­лерин мектебра и сувар. И юкъуз­ ан­ра сад ла­­гьай­ класс­рин аял­ри (абур 298 авай, сентябрдиз сифте яз пар­тай­рихъ 300-дав агакьна аялар ацукьда) 327 жегьил­диз (адакай 111-да 11- ва 216-да­­ 9-класс акьал­тIар­нава) мектеб акьал­­тIар­навайви­лин эхиримжи зенг яна.

Гурлу мярекатра мектебрин коллективрихъ галаз санал аялрин диде-бубайрини активнидаказ иштиракзавай. Виликамаз туькIуьр­на­вай махсус план-графикдин бинедаллаз гьар са хуьруьз, мектебдиз райондин регьберар, образованидин управленидин ва бязи маса идарайрин  руководителарни пешекарар фенвай.

Эхиримжи зенгинин мярекатар ан­ра хуш тебрикрин рахунар авуналди ва мектебрин гьевескар артистри ватанперсвилин манийрин концертар гуналдини, кьуьлер авуналди ва райцентрада тамашуниз лайихлу чкайра шадвилин къекъуьнралди давам хьана.­

Дашдемир Шерифалиев