РФ-дин аксина кардик кутунвай серенжемар себеб яз, дагълух чкайриз куьмек гунин госпрограммадин сергьятра аваз Дагъустандин властри, чара ийизвай субсидийрин кьадар артухарнава.
Эвез хъийидай харжийрин агъа кIанин кьадар 50 агъзур манатдилай 200 агъзур манатдал кьван гзафарнава, хабар гузва РД-дин экономикадин ва мулкар виликди тухунин министр Арсен Рустамова.
Дагълух мулкар виликди тухуниз талукь госпрограммадин сергьятра аваз субсидияр къачун патал арзаяр кьабулиз башламишнава. Идалай вилик йисара субсидийрин кьадарар 50 агъзур манатдилай 3 миллион манатдал кьван тир. Программадик алай йисуз дегишвилер кутурдалай кьулухъ эвез хъийидай харжийрин агъа кIанин кьадар идалай виликди авай 50 агъзурдалай 200 агъзур манатдив (хуьруьн майишатдин гъвечIи техникадай) ва 500 агъзур манатдив (фад арадал къведай ва гзаф бегьер гудай жуьредин багълар кутунай) агакьдалди хкажнава.
Уьлкведин аксина сергьятламишдай серенжемар кардик кутуни ва, талукь яз, логистикадихъ галаз алакъалу четин месэлаяр арадал атуни хуьруьн майишатдин гъвечIи техникадин ва тадаракрин къиметриз таъсирна. “Ихьтин гьалара, субсидийрин кьадар гзафар тавуртIа, хуьруьн майишатдин суьрсет гьасилзавайбуруз куьмек гунин мумкинвал саки квахьзава”, — къейдзава идарадин векилди.
Адан гафаралди, субсидияр эхиримжи пуд йисан вахтунда республикадин дагълух чкайра регистрация авунвай ва хуьруьн майишатдин суьрсет гьасилзавай карчийривай къачуз жеда.
“Программадин сергьятра аваз государстводин патай куьмек ругуд рекьяй гузва. Кьилди къачуртIа, промышленный ва я недай суьрсет, хъвадай шейэр гьазурдай тадаракар маса къачур, теплица ва я гьасилай суьрсет хуьдай оптово-логистикадин центр (емишар ва майваяр хуьдай гьамбарханаяр) эцигай, хуьруьн майишатдин гъвечIи жуьредин техника маса къачур ва я фад арадал къведай ва гзаф бегьер гудай жуьредин багълар кутур куьмекдин хсуси майишатрин иесийривай 50 процентдив агакьна харжияр эвез хъувунин субсидияр къачуз жеда”, — къейдзава министерстводин пресс-къуллугъди.
РД-дин экономикадин ва мулкар виликди тухунин министерстводи хабар гузвайвал, документар алай йисан 24-июндалди кьабулда.
“Арзаяр гваз региондин Минэкономразвитиядиз ва я МФЦ-диз физ жеда. Программада иштиракунин шартIар ва лазим документар гьихьтинбур ятIа министерстводин официальный сайтдин (minec-rd.ru) “Дагълух мулкар виликди тухун” чина къалурнава.
«Лезги газет»
