11-майдиз Москвада Вирироссиядин экологиядиз талукь шикилрин конкурсдин федеральный паюнин нетижаяр кьуна. Къейд ийин, кьуд паюникай ибарат тир и конкурсдин сад лагьай, яни мектебра тешкилзавай пай алатай йисан 1-октябрдилай 1-ноябрдалди кьиле фенай. Региондин пай 1-мартдалди давам хьана.
И йикъара эхиримжи паюна “КIвалин гьайванар” номинацияда “Вафалу дустар” шикил гваз Мегьарамдхуьруьн райондин аялрин яратмишунрин центрадин “Устадрин уьлкве” кIватIалда чирвилер къачузвай Азиза Азимовна Къазибегова гъалиб хьана. Идакай конкурс Дагъустандин мулкунал кьиле тухун тешкилай РД-дин образованидин ва илимдин министерстводи хабар гузва. Къейдзавайвал, конкурсдин пишкешар гьакIни республикадин жуьреба-жуьре мектебрай тир 19 аялдини къачуна.
Экологиядиз талукь конкурсдин регионрин паюна чпин яшар 5 йисалай 18 йисал кьван тир 21 060 касди иштиракна. Федеральный паюниз 1621 кIвалах (гьакьван аялар уьлкведин регионрин паюна гъалиб хьана) агакьна, абурун арада 29 кIвалах Дагъустандин аялрилай атанвай. Конкурсда, хабар гузвайвал, уьлкведин 54 субъектди иштиракна.
Вирироссиядин экологиядиз талукь шикилрин конкурсдин макьсад, къейдзавайвал, аялрин ва жегьилрин фикир чун элкъвена кьунвай алемдин, тIебиатдин четин месэлайрал желб авун, акьалтзавай несилдин яшайиш ва ацукьун-къарагъун экологиядин истемишунриз жаваб гудайди, и жигьетдай савадлуди авун, художественный яратмишунрин куьмекдалди гражданвилин ва ватанпересвилин тербия агакьарун я. И конкурс кIелунин гьар йисуз кьиле тухузва. Ада иштиракиз кIанзавайбуру конкурсдин сайтда (ecorisunok.fedcdo.ru) арза эцигун лазим я.
«Лезги газет»
