И йикъара Дагъустандин зегьметдин ва яшайиш виликди финин министр Абдурагьман Магьмудовахъ галаз “Объясняем.рф” проектдин эфирда агьалийриз яшайишдин рекьяй куьмекар гунин месэлаяр веревирдна.
Агьалийриз яшайишдин рекьяй куьмекар гунин са жерге серенжемрин арадай яз, министрди хизанриз датIана дуллух арадал гъиз куьмекзавай чешмедал, вич нетижалу алат яз къалурнавай яшайишдин рекьяй икьраррал (соцконтракт) фикир желбна.
“Дагъустанда вири санлай 6777 икьрар кутIундайвал я. Республикадин вири агьалияр желб авун патал абур министерстводи, чпихъ тIимил агьвал авай хизанар фикирда кьуналди, муниципалитетриз чара авунва. Къенин юкъуз яшайишдин вири санлай 4800 икьрар кутIуннава”, — къейдна ада.
Яшайишдин рекьяй икьрар программайрин 4 жуьредай кутIуниз жеда. Иник кьилдин карчивилин кIвалах кьилиз акъудун, уьмуьрдин четин шартIарай экъечIунихъ элкъуьрнавай серенжемар, кIвалах жагъурунихъ элкъуьрнавай икьрарар ва кьилди са касди вичин куьмекдин майишат кьиле тухун ква.
Министрди гъавурда турвал, соцконтракт кутIундайла, яшайишдин адаптациядин кьилдин программа арадал гъида. Ана агьалидал гьи кьадарда аваз куьмек агакьдатIа къалурда. Программада мадни куьмек агакьарунин паяр галай-галайвал, гьакIни инсандиз масадалай аслу тушиз вич ва вичин хизан таъминариз куьмекдай серенжемрикай кхьида.
А.Магьмудова алава хъувурвал, соцконтрактдин квотайриз ва и ва я маса жуьредай гьар са муниципалитетда ку-тIуннавай икьраррин кьадардиз талукь малуматар Дагъустандин зегьметдин ва яшайиш виликди финин министерстводин сайтдай чириз жеда.
«Лезги газет»
