Гьич са диде-бубадизни чпин веледдин тIал такурай!
Аялар чIехи жедалди гьар са диде-бубадал жуьреба-жуьре четинвилер ацалтдай, абур арадай акъуддай рекьер-хуьлер регьятбур тушиз, кIеви уламра, залан имтигьанра гьатдай вахтарни жеда. Амма инал ихтилатзавай дуьшуьшда диде-бубадин кенефдин кьил квахьнава…
СтIал Сулейманан райондин Кьасумхуьрел яшамиш жезвай Фарид ва Зарина Шихмегьамедоврин хизанда кьве велед — Фатима ва Абдуллагь чIехи жезва. Кьведни гьар юкъуз уьмуьр патал женгина ава. Абдуллагьан дуьшуьш иллаки четинди я. КIарабдин мефтIедин азар (первичный иммунодефицит: ХГБ-хроническая гранулематозная болезнь) аваз, датIана дарманрал алай адаз Израилда операция авунин чарасузвал ава. Кьилиндини, къимет 20 миллион манат тир операция духтурри жезмай кьван фад авун меслятзава. Амма хуьре са бубат чпин кьил хуьзвай хизандихъ ихьтин такьатар авач. Абуру куьмек тIалабзава. Къенин юкъуз 10 миллион манат кIватIиз — Аллагьдин кьадардалди рекьин са паюниз физ алакьнава. Къуй гьар са касдин садакьа Аллагьди кьабулрай!
— Дуьньядиз къведайла, руш Фатимадин кьилиз тIарвал хьана. Адан пакун 3 тIвални ханвай. Руш хайи йикъалай чун азарханайра, датIана анра яшамиш хьана лагьайтIани жеда, — суьгьбетзава Заринади. — ДЦП диагноз авай ам 4 йис тирла кIвачел акьалтна. Ам ажалдин къармахрай акъудай дуьшуьшар садни вад хьанач. Къенин юкъузни рушаз духтуррин, пешекаррин патай куьмекдин еке игьтияж ава. Дарманар хьиз, массаж, сагъламардай физкультура (ЛФК) лазим къвезва. Шукур хьайи Аллагьдиз и имтигьан чаз тIимил акуна. Кьвед лагьай аялни начагъди хьана.
Абдуллагьан исятда 4 йисни 3 варз я. Саки кьве йис идалай вилик, адан тахминан кьве йисни варцар тирла, денбеден ам начагъ хьана — бедендал ифин акьалтна, экъуьчиз ва къен физ эгечIна. Ихьтин дуьшуьшра, гьар са дидеди хьиз, Заринади аял духтуррин патав райбольницадиз тухвана. Дарманралдини рапаралди сагъарна, кIвализ ахъайна. Амма ифин сакIани алатнач. Тамам 2 вацра аялдин гьал хъсан тахьуни дидедин рикIик къалабулух кутуна. Эхирни ам гваз Санкт-Петербургдиз фидайвал хьана.
— Аллагьдиз шукур , ина чун гъавурда авай хъсан духтуррал ацалтна. Гастроэнтерологди аялдин гьал дериндай ахтармишун кьетIна. Диагноз эцигна. Амма а чIавуз заз первичный иммунодефицит: ХБГ азар вуч ятIа чизвачир, — рикIел хкизва дидеди. — Азар чIуруди тирди чир хьайила, за кIвачерикай садлагьана чил хкатайди гьиссна. Гьич са диде-бубадизни чпин веледдин тIал такурай! Питердай зун Абдуллагь гваз Москвадиз Рогачевскийдин центрадиз рекье туна. Ина диагноз тестикь хьана. Дарманар тайинарна. МасакIа и азар сагъариз тежезвайвиляй кьилин мефтI трансплантация авун чарасуз тирди раижна.
Шихмегьамедоврин хизандин йифен ахвар, йикъан кьарай квахьна саки 2 йис жезва. И вири вахтунда аял дарманрал (бязибур гормонар я) ала. Йикъа ада вадалай тIимил тушиз дарманар хъвазва. ТахьайтIа, адавай тIуьн ерли иливариз жезвач.
Халкьдин къажгъан муркIадални ргада лугьузва бубайрин камаллу мисалда. Чаз садазни чи кьилел пака вуч къведатIа чизвач. Гьавиляй авур хъсанвал садрани квахь тийидайди чна рикIелай ракъур тийин. Чна чарадан тIалдикай хабар кьадай вирибурувай — мергьяматлу, гъил ачух инсанривай Шихмегьамедоврин хизандиз куьмек гун тIалабзава.
Пулдин куьмек квевай агъадихъ галай реквизитриз рекье тваз жеда:
Карта Сбербанка: 5228 6005 2636 9808
Зарина Фекретовна
Сбер-Онлайн: 89220682626
Тинькофф: 5536 9141 1480 5801
Фарид Зейдулахович
Автор: Рагнеда Рамалданова
