“Хуьруьн муаллим” (“Земский учитель” ) программадин сергьятра аваз алай йисуз республикада муаллимар патал 93 азад чкадин сиягь туькIуьрнава. Идакай РД-дин образованидин ва илимдин министерстводи хабар гузва.
“Хуьруьн муаллим” проектди муаллимриз педкадрияр бес тежезвай хуьрерин мектебра кIвалахдин чкаяр теклифзава. И программадин сергьятра аваз кIвалахал акъвазай муаллимриз 1 миллион манат куьмекдин пул гузва.
РД-дин гьукуматдин къарардалди “Хуьруьн муаллим” проектда гьам жегьил пешекардивай, гьамни 55 йисан яшдилай чIехи тушир ва педагогвилин кьилин образование авай тежрибалу муаллимдивай иштиракиз жезва. И кар патал мектебда 5 йисалай тIимил тушиз кIвалахун ва, “Земский учитель” порталда вичикай делилар къейд авуналди, кIвалахдай мектеб хкягъуналди, арза гун лазим я.
Чпин арзайра кIвалахун патал куьч хьун пландик кутунвай чка яз 2021-йисан сентябрдилай къенин йикъалди кIвалахзавай муниципальный тешкилат къалурнавай муаллимдиз программада иштиракдай ихтияр авач. “Хуьруьн муаллим” программада иштиракун патал Дагъустандин образование еримлу авунин институтдиз арзаяр гун 31-майдалди давам жеда.
«Лезги газет»
