И йикъара, ЧIехи Гъалибвилин суварин мярекатрин сергьятра аваз, Ахцегь райондин Къурукаларин хуьре — Женийрал, спортдин цIийи имарат — девирдин истемишунрив кьур мини-футболдин майдан шадвилин гьалара ачухна. “Хуьрерин мулкар комплекснидаказ вилик тухун” республикадин махсус программадик кваз эцигнавай имаратдин (1056 квадратдин метр) заказчик РД-дин хуьруьн майишатдин министерство яз, эцигунар вахтунда ва хъсан ери аваз чкадин “Айиша” ООО-ди (регьбер Эдуард Магьмудов) тамамарна. Сметадай проектдин къимет 2 миллионни 948 агъзур манат яз (адакай 500 агъзур манат меценатди, гьакьванди — райадминистрацияди ва амайди республикадин бюджетдай ганва) гьакъикъатда эцигунрин материалрин къиметар хкаж хьуникди ва сметада къалурнавайдалай артух кIвалахар арадал атуникди умуми къимет са миллион манатдилай артух хъхьана.
— Гьуьрметлубур, къе чна районда курортдин чка тир Женийрал Къурукаларин хуьруьн жегьилриз футболдин вижевай майдан ачухна, кардик кутазва. Мубаракрай! Ахцегь райондин футбол республикадин дережадиз акъуднавай чи ватанперес спонсор, футболдин “Ахцах” клубдин президент Мегьамед Алишев, тренер Камиль Гьажиев, и майдандин эцигунрал пулунин хсуси такьатар харжнавай жумарт спонсор Феликс Байрамалиев, пудратчи Эдуард Магьмудов ва чпин пай кутунвай вирибур сагърай! Разивилелди лугьун: им районда футболдин 7-майдан я. Мукьвара Ахцегьа зурба спорткомплексни ишлемишиз вахкуда. Эвелимжи нубатда, им Ахцегь райондин ва Дагъустан Республикадин регьберри хуьруьн чкада спортдин къурулушар хъсанаруниз дикъет гунин нетижа я, — къейдна, кIватI хьанвайбур тебрикуналди, райадминистрациядин кьилин заместитель Гьажи-Омар Рамазанова.
— Спорт — им сагъламвал мягькемарзавай, жегьилар хъсан крарал тупламишзавай гужлу такьат я. Вичин вахтунда чун, хуьруьн аялар, инал, нацIарини чими кьарари кьунвай къулайсуз майдандал, футбол къугъваз чIехи хьана. Гила ихьтин хъсан майдандин спонсорвал ийидай, райондиз алакьдай куьмек гудай мумкинвал хьунай за Аллагьдиз шукур гъизва. Гележег хъсан хьун патал гьар са кас жуван хайи ватандин къайгъудар жез алахъна кIанда,- лагьана эцигунрин спонсор Феликс Байрамалиева.
Мярекатдин тамададин теклифдалди (и везифа райондин культурадин управленидин начальникдин заместитель Сулейман Сулейманова тамамарзавай) рахун патал нубатдин гаф спортдин зурба терефдар, “Ахцах” футболдин клубдин президент, алай вахтунда Брянск областдин Карачево шегьердин “Спутник” ФК-да къугъвазвай Мегьамед Алишеваз гана.
— Спортдин, футболдин сифте камар за гьа и майдандилай къачуна. Гьамиша мурад инал футболдин хъсан майдан хьун тир. Аллагьдиз шукур, и мураддив зун агакьна. Гележегда закай уьлкведин дережадин пешекар футболист хьунин ва хуьре мини-футболдин майдан арадал атунин себебкар чи гьуьрметлу Феликс стха я. Зун футболдин командадик кваз Россиядин гзаф шегьерра хьана. Хиве кьан: виринра ихьтин шартIарин майданар авач. Гьа са вахтунда Ахцегь райондин жегьилрин ихтиярда вири истемишунриз жаваб гузвай дуьз ирид майдан хьанва. Жегьилриз спортдал рикIивай машгъул жедай къулай шартIар яратмишзавай райондин кьиле авай ксар ва спонсорар сагърай! Абурун зегьметдал къимет эцигун яз, и майданар ишлемишна ва хвена кIанда. Гила футболдай республикадин дережада лап хъсан нетижаяр къазанмиш тийидай чаз са багьнани авач, — лагьана футболистди.
Спортдин майдан ачухунин митингдал гьакI эцигунрин пудратчи Эдуард Магьмудов, районда диндин чирвилер гегьеншарунин рекьяй республикадин муфтиятдин векил Узаир Шамилов, Къурукаларин хуьруьн школадин директор Альберт Ашниев, футболдин ветеранар — махачкъалави Нариман Омаров, луткунви Нурудин Багъиров ва маса юлдашар рахана. Райондин искусствойрин школада чирвилер къачузвай аялри чпин кьуьлералди ва РДК-дин гьевескар артист Фаргьад Гьашумова вичин манийралди мярекатдин иштиракчийрин гуьгьуьлар мадни шадарна.
Шадвилин митингдилай кьулухъ цIийи майдандал республикадин футболдин ветеранрин командайрин арада акъажунар башламишна. Чи баркаллу хва Мегьамед Алишева тешкилна, спонсорвална, кьиле тухвай и турнир тамашуниз лайихлуди, пара итижлуди хьана, гьикI хьи, ана махачкъалавияр тир Алияр Исмаилов, Нариман Омаров, Азербайжандин хкягъай командада хьайи Кемран Агъамирзоев хьтин машгьур футболистар къугъвазвай. Турнирда вири 6 командади (Махачкъала, Дербент щегьеррин, Ахцегь, Кьурагь, СтIал Сулейманан районрин ва Къурукаларин хуьруьн) иштиракна. Гъалибвилин 1-чка “Махачкъала-интернационал” командади кьуна. Кьвед ва пуд лагьай чкаяр “Дербент” ва “Ахцагь” командайри пайна. Талукь тирвал, абуруз 20, 15 ва 10 агъзур манат пулунин премияр, кубокарни дипломар гана.
Дагъустандин стха халкьарин арада дуствилин алакъаяр мягькемарунин карда ихьтин мярекатрихъ еке метлеб ава.
Дашдемир Шерифалиев
