И мукьвара зав залан хабар агакьна. Педагогикадин ветеран, агъул халкьдин арада тIвар-ван авай муаллим, тербиячи, рикI михьи, хъсан инсан Абдулкъадир Шабанович Мазанаев рагьметдиз фена. Адан 96 йис тир. Яшлу инсанар хизандин, хуьруьн, уьлкведин, уьмуьрдин берекатар, халкьдин хъсан адетар хуьзвай даяхар, камалдин чешмеяр, жегьил несилриз умудар гузвай къуватар я. Абдулкъадир халу гьа ихьтин инсан тир. Ада вичин уьмуьрдикай 60 йисалай гзаф хуьруьнвийрин аялриз чирвилер гуниз бахшна. А.Ш. Мазанаеван ученикрикай государстводин ва жемиятдин тIвар-ван авай деятелар, армияда ва къанунар хуьдай органра чIехи чинра авай къуллугъчияр, алимар, духтурар, педагогар хьанва.
А.Ш.Мазанаев 1926-йисуз Агъул райондин Буршагърин хуьре дидедиз хьана. Сифтегьан классрин мектеб куьтягьайдалай кьулухъ ада Кьурагьрин ирид йисан школа акьалтIарна. Дяве башламиш хьана. 15 йиса авай жаван колхоздиз кIвалахиз фена. Фронтдиз тухун тавурла, яш бегьем тахьанвай жегьилди вич зегьметдин армиядиз гуьгьуьллудаказ рекье тун тIалабна. Ина жегьил буршагъвиди саки кьве йисуз кIвалахна. Адаз “Кавказ оборона авунай” медаль, грамота, къиметлу пишкешар гана.
1943-йисан августдиз А.Мазанаев хайи хуьруьн сифтегьан классрин школадин заведующийвиле тайинарна. КIвалахни ийиз, ада Дербентдин педучилище акьалтIарна. Шабановича ва Гуьлжагьан Къаидовнади хизанда вад хвани ругуд руш чIехи авуна, абуруз чешнелу тербия, вини дережадин образование гана. Мазанаеврин интернациональный чIехи хизан течир агъулви бажагьат ава.
Абдулкъадир Шабановичаз лезги чIал лап хъсандиз чидай. Ада вичин веледризни лезги чIал чирна. Ада лугьудай: “Са мус ятIани, низ ятIани агъулвиярни лезгияр чара ийиз кIан хьуналди, чи арада авай мукьвавал квадариз жедайди туш. Чун шагь дувул дегь заманайра авай стхаяр я. Чи садвал чи къуват я”. Гзаф йисара ам “Лезги газетдин” подписчик тир.
Зегьметда ва общественный крара лайихлувилерай Абдулкъадир Шабановичаз медалар, къиметлу пишкешар, гьуьрметдин грамотаяр, “РСФСР-дин халкьдин образованидин отличник” лагьай тIвар гана. Амма ада виридалайни багьа шабагь веледрикай, вичи чирвилер ва тербия гайи ученикрикай халкьдин арада гьуьрмет авай, намуслу инсанар хьун, абурун агалкьунар, хушбахтлувал яз гьисабдай.
За — Абдулафис Исмаилова ва зи хизанди — ДГУ-дин филфакдин декан, профессор Шабан Абдулкъадирович Мазанаеваз, адан стхайриз, вахариз, багърийриз Абдулкъадир Шабанович Мазанаев кечмиш хьунихъ галаз алакъалу яз, хажалат чIугуналди, башсагълугъвал гузва.
«ЛГ»
