“Лезги газетдин” 12-майдиз акъатнавай нумрада чи рикI алай муаллим, алим, ДГУ-дин профессор, литературовед, фольклорист, жегьилрин дуст, халисан насигьатчи Гьажи Гьуьсейнович Гашарован 85 йисан юбилейдиз талукьарнавай материалар чапнавай.
Абурун тереф хуьналди, зазни са шумуд келима алава ийиз кIанзава. ГьикI хьи, Гьажи Гьуьсейновича хайи лезги литературадай илимдин чирвилер ва халисан ватандашвилин тербия гайибурук зи буба, шаир ва муаллим Абдурагьман Межидов ва зунни ква.
Чна кьведани вузда заочнидаказ кIелна. И кар, за гьисс авурвал, регьятди тушир. Гьажи Гьуьсейновича заз хайи эдебиятдай ва чIалай неинки кьилин образование къачудай, гьакI аспирантурада кIелдай, филологиядин илимдин рекье жуван гафни лугьудай мумкинвал гана!
Ам гьакъикъатдани еке зегьметкеш, вичи тарс ва тербия гайибурни зегьметдихъай кичIе тежез, гъиле кьур кIвалах кьиле кьван тухуз вердишарзавай рухвайрикай — арифдаррикай сад я. Ихьтин муаллим жувахъ хьунал за шадвалзава! Дамахзава!
Мубаракрай юбилей, гьуьрметлу Гьажи Гьуьсейнович! Сагълам йисар мад гзаф гурай ваз!
Ви рикI алай ученикрикай сад тир Сардар Абил.
