Алатай гьафтеда Ахцегьрин краеведческий музейда лезги чIалал ватанпересвилин шиирар кIелунай “Заз зи Ватан кIанда” лишандик кваз мектебра кIелзавай аялрин арада кьиле фейи конкурсдин гъалибчийрив, кIвенкIвечи чкаяр кьурбурув пулдин пишкешар, савкьатар вахкуниз талукьарнавай мярекат кьиле фена.
Ватан хуьзвайбуруз бахшнавай и мярекатдин кьилин спонсор меценат Нариман Гъазалиев тир. Тешкилатчийрин арада РД-дин жегьилрин крарин рекьяй министерство ва Дагъустандин писателрин Союз авай.
Тешкилатчийрин гафаралди, конкурсда республикадин жуьреба-жуьре районрайни шегьеррай 110 аялди иштиракна. Нетижада 1-чка — Ахцегь райондин Луткунрин хуьруьн мектебдин ученица Сумая Мегьамедовади (пулдин пишкеш — 30 агъзур манат), 2-чка — Дербент райондин Белиж поселокдин 4-нумрадин мектебдин ученица Сабина Гьажиевади (20 агъзур манат), 3-чка СтIал Сулейманан райондин ЦIийихуьруьн мектебдин ученица Гуьзелагъа Рамазановади (10 агъзур манат) кьуна. Гъалибчийрилай гъейри, 1 агъзур манатдин кьадарда аваз пулдин пишкешриз конкурсда тафаватлу хьайи мад 10 кас лайихлу хьана.
* * *
7-майдиз Ахцегь райондин Гъуьгъвезрин хуьре армрестлингдай республикадин дережада аваз ЧIехи Гъалибвилиз талукьарнавай турнир кьиле фена. Акъажунрин кьилин спонсорвал Нариман Гъазалиева авуна. Ада турнирдин гъалибчийрин арада паюн патал 75 агъзур манат пул чара авунвай.
И юкъуз Гъуьгъвезиз, чпин гъилерин къуват ахтармишиз, Махачкъаладай, Каспийскдай, Дербентдай, Хив, СтIал Сулейманан, Ахцегь районрай цIудралди спортсменар атанвай.
Къейд ийин хьи, Н.Гъазалиеван куьмекдалди цIи Кьиблепатан Дагъустандин жегьилрин арада образованидиз ва спортдиз талукьарнавай мад са шумуд мярекат кьиле фида.
«Лезги газет»
