Алатай гьафтеда Белиждин стадиондал “Гъалибвилин пайдах” лишандик кваз, ЧIехи Гъалибвилин 77 йис тамам хьуниз талукьарна, поселокдин школайра кIелза­вай жаванрин арада велоспортдай республикадин ачух турнир кьиле фена. Адан тешкилатчияр Дербент райондин ва Белиж поселокдин администрацияр тир.

Турнир гатIундалди мярекатдин иштиракчийри Белиждин стадиондилай генерал Т.Гьажиеван, ахпа З.Арухован куьчейрай центрадиз кьван, малум тушир аскердин тимталдал цуькверин кIунчIар эцигна, элкъвена стадиондал велопробег кьиле тухвана.

Ана Белиж поселокдин кьил Рамиз Гьабибулаева, Дербент райондин администрациядин спортдин отделдин начальник Абубекр Ханмегьамедова, велоспортдин “Леки” клубдин регьбер Радик Апаева, поселокдин интеллигенциядин векилри, школайрин директорри, аялри ва мярекатдиз къаюмвал авур бязи карчийри иштиракна.­

Мярекат, турнирдин иштиракчияр тебрик­ авуналди, Рамиз Гьабибулаева ачух­на.­

— 9-Май чи ватандин тарихда, гьакI­ни гьар са хизандин уьмуьрда кьетIен югъ я. Чна чун сад тир са халкь яз ан­­намишзавай ихьтин маса югъ авач. И турнир чна Украинада кьиле тухузвай военный махсус­ серенжемда дирибашвал къалурзавай аскерриз бахшзава. Чи бубайри къе чун ислягьдаказ яшамиш хьун патал чпин чанар­ къурбандна, Гъалиб­вал къазанмишайди чна садрани рикIелай ракъурдач. Акьалт­завай несилдизни и кар чирун важиблу я, — къейдна ада.

Ахпа анал Абубекр Ханмегьамедов, Радик Апаев  ва масабур рахана.  Абуру, сан­лай спортди хьиз, велоспортдини инсандин сагьламвал ва руьгь мягькемарзавайди лагьана, иштиракчийрихъ агалкьунар хьун алхишна.

Яшарин вад дережадай кьиле фейи ачух турнирда ругуд командади иштиракна. Къизгъиндиз кьиле фейи акъажунра гимназиядин командади — 1, 2-нумрадин СОШ-дин командади — 2 ва 4-нумрадин СОШ-дин командади 3-чкаяр кьуна.

КIвенкIвечи чкайриз гьакIни 2-3 -класс­ра кIелзавайбурун арада — Салим Гьажиметов (2-нумрадин СОШ), 4-5-классра кIел­завайбурун арада — Нариман Абдулгьа­мидов (гимназия), 6-7-классра кIелзавай­бурун арада — Умар Разаханов (4-нумрадин СОШ), 8-9-классра кIелзавайбурун арада — Асад Рамазанов (гимназия) ва 10-11-классра кIелзавайбурун арада Герман Салманов (гимназия) лайихлу хьана.

КIвенкIвечи ва приздин чкаяр кьур вири­буруз кубокар, медалар ва къиметлу пиш­кешар гана. Поселокдин кьили ва “Ле­ки” клубдин регьберди турнирдиз къаюмвал авурбуруз чухсагъулдин чарар гана.

Къагьриман Ибрагьимов