Играми Майрам Мирзалиевна Магьамдалиева!
Яргъал йисара багъри «Лезги газетдин» редакцияда кIвалахиз, сифтегьан гранкаяр кIелзавай подчикчицадин, жергедин литработникдин къуллугъдилай башламишай ви рехъ газетдин жавабдар корректордин дережадиз кьван хкаж хьана. Ви зегьмет «Дагъустан Республикадин культурадин лайихлу работник» лагьай чIехи гьуьрметдин тIвар гуналди къейднава. Газет кIелзавай агъзурралди чи ватанэгьлийрин патай вахъ еке ихтибар ва гьуьрмет хьанвайдини рикIел хуьниз лайихлу я. Газетдик вуна мухбир язни, куьруь гьикаяяр, мезелияр, махар кхьизвай автор язни, хейлин пай кутазва.
Куьрелди, вакай газетдиз халисан хайи руш, коллективдизни бах, вах хъсан насигьатчи, ихтибарлу юлдаш хьанва. Гьавиляй ви тIварцIихъ шаирдини ихьтин цIарар лагьанва:
Майдин руш я, михьивилиз мелек я.
Маралдилай, марвардилай гуьрчег я!
Вичин кIвалах гуьзгуь хьиз чаз герек я,
Гьар нумрадин лап кар алай дирек я!
Йисар фенва… Туна тахтар Гиярдин,
Меркезда чи муг кутуна цавярдин.
Шумуд бала – бахт багъишна на ярдиз,
Маса кьисмет кIан хьанач ви хиялдиз.
Халкьдин руьгьдин къулаз мерддиз къуллугъна,
Хцивал хуьз, чар-къелемдиз буйругъна.
Алхишарни къазанмишна буллух на,
Гила кьабул юбилейдин сагълугъ на:
Яшамиш хьухь мадни сагъдиз, Майрам яз,
Майва гъизвай багъдилайни тIарам яз…
Чаз вун гележегдани сагъ яз, шад яз, къелем хци яз, сидкьи чIехи яз, чахъ галаз кIвалахиз, яшамиш хьана кIанзава. Четинвилериз дурум гуз, хайи чIалаз, милли культурадин къулаз вафалувал хуьнай ваз аферин, баркалла!
Ви гуьзел юбилей тебрикзавай «Лезги газетдин» редакциядин коллектив.
«Лезги газетдин» кьилин редактор М. Ибрагьимов
08.05.2018-йис
