Жув вердиш хьанвай къайда я, гьамиша за милли газетдин цIийи нумра гьевес кваз гуьзлемишда. ГьикI лагьайтIа, газет гъиле гьатайвалди, гьасятда анай за гзаф гьуьрметзавай Нариман Ибрагьимован, Шихмурад Шихмурадован, Мерд Алидин публицистикадин макъалаяр, веревирдер жагъурзава. Заз абурай гзаф затIар чир, зи тежрибани девлетлу жезва, жувакни руьгьдин цIийи къуватар акатзава. Абуру зи кефсузвални рикIелай алудзава. ИкI абуру заз духтур эвеззава лагьайтIани жеда. Гьа икI — гьар сеферда. За абуруз камаллу “гафаринни келимайрин духтурар” лугьузва. Сагъдиз хьурай зи къелемдин стхаяр.
Алай йисан газетдин 10-нумрадай за Н.Ибрагьимован “Пайгьамбардин хьтин гафар”, Ш.Шихмурадован “Тарихдикай тарс хкуд тавурла”, М.Жалилован “Вуч цана? Вуч вахчузва?” макъалаяр кIелна. Къадир авайдаз, кьилелди фагьум-фикирзавайдаз абур вижевай затIар хьанва. И пуд автордин гъиликай хкатзавай ва чапзавай макъалаяр заз иллаки бегенмиш я. Абур кIелиз ашкъи-гьевес жезва. Ксари фадлай рикIел аламачир тарихдин лап чарасуз герек делилар кIелзавайдан вилик гъизва.
Н.Ибрагьимова вичин макъалада чIехи регьбер Сталинан зурба лайихлувилер рикIел хканва. Вич ам пагъаймбар хьтин кас яз, гафарни пайгъамбардин хьтинбур яз къейднава. Ам гьахьтин кас хьайидал жизвини шак гъиз жедач. ГьикI лагьайтIа, адан бажарагъдикай гзаф кхьенва, лагьанва. Гьукуматдин кьилиз сад-садан гуьгъуьналлаз гзаф регьберар атана. Амма Сталиназ хьиз халкьари мад садан тIварцIизни гьуьрметнач. Тарихдин къадир авайбуру, Ватан кIанибуру Сталиназ дуьз къимет гузва. Гирт дегьнейриз эвичI тавуна, и жигьегьдай Нариманан макъаладин хъсанвиляй жуван рикIевай кьве келимани лугьуз кIанзава. Зи дахни (Жалавхан) адан стха Самурхан ва амле Миликмамедни 1941-1945-йисарин дяведин цIаяра телеф хьана. Заз абур акур ксар туш. Абуру Ватан хуьнин рекье чанар гана. За Сталинан тIварцIиз екез гьуьрметзавайди я. Зи кIвалин цлал Сталинан еке портрет ала. Чи инициативадин дестедиз Сталиназ памятник хкажунин фикир авай. Амма тайин чка къалур тавуни и кар кьулухъ яна. Гележегда туькIуьрда и карни. Эхь, Ватандин, халкьарин вилик регьбер Сталинан лайихлувилер лап зурбабур я. Рагьмет хьурай вичиз.
Райсудин Набиев
