8-майдиз Дербент шегьерда, Ватандин ЧIехи дяведин ветеран, Сталинграддин женгерин иштиракчи, полковник, СССР-дин гьуьрметлу чекист Девришбегов СултIан-Агьмед Биренбеговичан тIвар куьчедиз гуниз ва мемориалдин кьул ачухуниз талукьарнавай мярекат кьиле фена.
Ана Дербент шегьердин депутатрин собранидин председателдин везифаяр вахтуналди тамамарзавай Мегьамед Мегьамедова, Россиядин МЧС-дин Дагъустанда авай Кьилин управленидин начальникдин заместитель Муслим Девришбегова, КПРФ-дин Дербент шегьердин отделенидин секретарь Пирали Пиралиева, жемиятдин векилри, кадетри, дербентэгьлийри ва ветерандин багърийри иштиракна.
Мярекат Женгинин баркаллувилин музейдин кьилин пешекар Гуьлпери Шабановади тухвана.
Анал вичин рахунра Мегьамед Мегьамедова къейд авурвал, и кIвалах ЧIехи Гъалибвилин суварин вилик кьиле тухун лишанлу кар хьана.
— Чна гьар йисуз куьчейриз Ватандин ЧIехи дяведин ветеранрин тIварар гузва, — давамарна ада. — Чи Ватандин аслу туширвал патал женг чIугур игитар гьуьрметдалди рикIел хуьн чи везифа, буржи я.
Ветерандин багърийрин патай Муслим Девришбегова вичин чIехи буба СултIан-Агьмед Девришбегован тIвар куьчедиз гунин къарар акъудай шегьердин руководстводиз сагърай лагьана.
СултIан-Агьмед Девришбегов 1920-йисуз Ахцегь райондин Чеперин хуьре гзаф аялар авай лежбердин хизанда дидедиз хьана. 7 йисан школа акьалтIарна, 1936-1937-йисара ам кала авай хуьруьнвийрин савадсузвал тергзавай культпоходдин иштиракчи тир. Дяве гатIундалди, ада хуьруьн колхозда са жерге къуллугъар тамамарна, ам колхоздин правленидин членвилени хкяна.
1941-йисан сентябрдиз СултIан-Агьмед Биренбегович гуьгьуьллувилелди фронтдиз физва. Сифте ада десантдин пуд лагьай корпусдин 5 лагьай бригадада къуллугъна. Душмандин далу патаз вегьин патал ада Ессентуки шегьерда военный рекьяй 8 вацран курсара кIел хъийизва.
Чи баркаллу ветеранди, сифте жергедин аскер, ахпа взводдин командир, сиясатдин рекьяй ротадин командирдин заместитель, десантрин гвардиядин частара автоматчикрин ротадин командир яз, Сталинграддин, Кьиблединни РагъакIидай патан ва 3-Украинадин фронтра иштиракай женгера зурба викIегьвилер къалурна.
Ахпа ада 57-гвардиядин стрелковый полкуна аваз Никопольско-Криворожский ва Ясско-Кишиневский операцийра, Румыния, Болгария, Югославия, Венгрия ва Австрия азад авунин женгера иштиракна. Австриядин Грац шегьердиз мукьва жедайла, адал залан хирер хьана. Гъалибвилин югъ ада военный госпиталда къаршиламишна.
1946-1977-йисара КГБ-дин органра жуьреба-жуьре жавабдар къуллугърал кIвалахна.
Фашистрин Германиядин винел Гъалибвал къазанмишунин карда къалурай дирибашвилерай ам женгинин кьуд ордендин, органра къуллугъ авунин лайихлувилерай СССР-дин ва РФ-дин медалрин, гьакIни ДАССР-дин, РД-дин Госсоветдин Гьуьрметдин кьуд грамотадин сагьибни хьана.
Къагьриман Ибрагьимов
