“Лезги газетдихъ” галаз 70 йисалай гзаф девирда дуствал хуьзвай, ам кхьизвай, кIелзавай ватанэгьлияр чи хуьрера са акьван гзаф авач. Ахьтинбурукай сад Мегьарамдхуьруьн райондин Уружбайрин хуьряй тир Мурсал Исаевич Жаватов я.
Яшар 90 йисарив агакьнавай и камаллу агъсакъалди вичин вири уьмуьр муаллимвилин пешедиз бахшна: хейлин йисара хайи хуьруьн юкьван мектебда лезги ва урус чIаларай тарсар гана. Къе педагогвилин зегьметдин ветерандихъ районда, республикада еке гьуьрмет, авторитет ава.
Мукьвара Мурсал Исаевич “Лезги газетдин” редакциядиз мугьман хьанвай. Редколлегиядихъ галаз кьиле фейи гуьруьшдал яшлу муаллимди къейд авурвал, ада хайи чIалал акъатзавай газет 1950-йисалай кIелзава, яни 72 йисуз хуьзвай дуствал къени давам жезва.
И кар фикирда кьуна ва хейлин йисара акьалтзавай несилриз лезги чIалай дерин чирвилер гунай газетдин кьилин редактор Мегьамед Ибрагьимова Мурсал Жаватовав “Лезги газетдин — 100 йис” медаль вахкана ва адахъ чандин сагъвални яргъи уьмуьр хьун алхишна.
Агьмед Магьмудов
