Алатай вацран эхирра Ростовдин областда армрестлингдай “Вольные степи” лишандик кваз ачух турнир кьиле фена. Ана чи уьлкведин регионрай тир 80-дав агакьна спортсменри чпин гъилерин къуват къалурна.
Шад жедай кар ам я хьи, и акъажунра лезги кьегьал, Росгвардиядин Дагъустан Республикада авай Управленидин кьилдин батальондин къуллугъчи, полициядин сержант М.Халикьова нубатдин сеферда вич къуватлу гъилерин сагьиб тирди субутна. ИкI, Мегьамедвелиди ина 100 кг-дин заланвал авайбурун арада 1-чка кьуна. Гила ада и акъажунра кьвед лагьай сеферда гъалибвал къазанмишнава.
РикIел хкин: 1992-йисуз Къизляр райондин Сарсар хуьре дидедиз хьайи М.Халикьова армрестлингдай Дагъустандин чемпионвилин тIвар галаз-галаз 10 сеферда къазанмишнава. Ада армрестлингдай — Вирироссиядин, гьакIни грэпплингдай республикадин турниррани са шумудра кIвенкIвечи чкаяр кьуна. Мегьамедвели армрестлингдай спортдин мастер, боксдай спортдин мастервиле кандидат я.
Чи мухбир
