И йикъара Дагъустандин госмедуниверситетдин студентка, Кьасумхуьрелай тир Зейнаб Гьасанбеговадин диде-бубадив Москвадай шад хабар агакьна: абурун руша “Современные тренды в хирургии” тIвар алаз кьиле тухвай Вирироссиядин жегьил алимрин конференцияда (ам алай йисан мартдиз Москвада А.В.Вишневскийдин тIварунихъ галай хирургиядин НМИЦ-ди ва Россиядин хирургрин обществоди тешкилнавайди тир) лауреатвилин тIвар къачуна.
Зейнаб Гьасанбегова 1999-йисан апрелдиз дидедиз хьана. 2016-йисуз ада Кьасумхуьруьн 1-нумрадин юкьван школа къизилдин медаль къачуналди акьалтIарна. Гьеле школада кIелзавай йисарилай рикIе духтур хьунин ва вичин дахдин рехъ давамарунин къаст авай Зейнаб гьа йисуз медицинадин университетдик экечIна. Сифте курсунилай эгечIна, факультетдин староста тир ада кIелзавай 5 йисузни вири имтигьанар ва зачетар лап хъсандиз вахкана. ДГМУ-дин лап хъсан студентрин арада аваз Зейнаба ина, гьакIни вузрин арада тухузвай олимпиадайра иштиракзава, анра кIвенкIвечи чкаяр кьазва. И карни Зейнаб Мегьамедшерифовнадиз ганвай грамотайрини дипломри тестикьарзава. ИкI, ада 2019-йисуз ДГМУ-да фармакологиядай (“Scientia est potentia”) тухвай университетдин къенепатан олимпиадада 2-чка кьуна. Москвада инновацийриз куьмек гунин Фондуни “УМНИК” программадай тухвай “Московский молодежный старт-2019” конкурсда Зейнаб финалдиз акъатна. Инновацийриз куьмек гунин Фондунин Генеральный директор С.Г Полякован къул алай дипломдай малум жезвайвал, гуьгъуьнин йисан апрелдин вацра Москвада “УМНИК” программадин майдандал Зейнабан проект 500 агъзур манатдин грантдиз лайихлу хьана.
Гила проект “Старт” майдандал ракъурун патал арза гьазурзава. Гуьгъуьнлай ДГМУ-дин лабораторияда илимдин рекьелди ахтармишун давамарун пландик ква.
Зейнаб Гьасанбеговадин проект РД-дин экономикадин ва мулкар вилик тухунин министерстводи тешкилнавай АСИ (агентство стратегических инициатив) форумдин “Сильные идеи для нового времени” региондин паюна иштиракун патал хкянава. Федеральный дережада аваз форумдин эхиримжи пай алай йисан ноябрдин вацра кьиле тухуда.
Зейнаб Гьасанбеговадиз ганвай сертификатрай малум жезвайвал, ада 2018-йисан 14-апрелдиз, Чечнядин госуниверситетдин 80 йисан юбилейдиз талукьарна, Грозный шегьерда нормальный физиологиядай вузрин арада тухвай олимпиадада, 2019-йисан 24-майдиз къецепатан уьлквейрай атай жегьил алимрин ва студентрин иштираквални аваз Махачкъалада, 2019-йисан июндиз чи республикадин меркезда кьиле фейи Россиядин хирургрин обществодин выездной Пленумда, Дагъустандин хирургрин XIX съездда, 2020-йисан январдиз ДГМУ-да химиядай тухвай вуздин къенепатан студентрин 3-олимпиадада иштиракна.
Зейнабан агалкьунрикай, гьеле студентка яз, ам хкаж хьанвай дережайрикай рахадайла, чаз са кар мадни къейд ийиз кIанзава: 2020-йисан 15-июндилай 21-июндалди “Территория инновационных идей, технологий и творческих решений” лишандик кваз тухвай Гатун виридуьньядин илимдин марафонда Зейнабан ахтармишунрин проект (“Разработка барьерных и биосовместимых нанопленок AI203 и TiO2 и применения на хирургических сетках”) 1-чкадиз лайихлу хьана.
Ихьтин агалкьунар, хъсан чирвилер авай руш тербияламишунай чна Мегьамедшериф Сулеймановичаз ва Селминат Мегьамедрасуловнадиз чухсагъул, аферин лугьузва. Зейнабахъ элкъвена мадни алава хъийиз кIанзава: вахъ кIелунра ва гъиле кьунвай илимдин кIвалахда мадни ва мадни чIехи агалкьунар хьурай!
Хазран Кьасумов
