Са шумуд югъ идалай вилик Мегьарамдхуьруьн райондин умуми образованидин идарайрин 5-6-классра кIелзавай аялрин арада волейболдай райондин кIвенкIвечивал патал акъажунар кьиле фена. Идакай райондин администрациядин пресс-къуллугъди хабар гузва. Спортдин серенжем райондин кьил Фарид Агьмедова вилик эцигнавай месэлаяр кьилиз акъудунин сергьятра аваз тешкилна ва кьиле тухвана.
Райондин физический культурадин ва спортдин отделди образованидин управленидихъ галаз санал кьиле тухвай серенжемдин макьсад районда волейбол машгьурун, ам еримлу авун, спортдин и жуьредал машгъул аялрин устадвал хкажун, бажарагъ авай волейболистар майдандиз акъудун, кьилиндини, сагълам уьмуьр кечирмишдай мумкинвал яратмишун тир.
Къизгъиндаказ кьиле фейи акъажунрин нетижада гъалиб хьайи командаяр грамотаяр, пишкешар гуналди къейдна.
Чи мухбир
